O millor cine feito por mullers se troba en a XVIII Muestra Internacional de Zaragoza

Dende o sabado 17 a o sabado 24 d'octubre o Centro d'Historias aculle a XVIII Muestra Internacional de Cine realizau por Mullers de Zaragoza. Una muestra que replega 25 obras audiovisuals que no han teniu proyección comercial, u no han plegau a enguerar-se en a capital aragonesa

CINE-MUJERES-2015-zgz-bannerIste cabo de semana rancó a XVIII Muestra Internacional de Cine realizau por Mullers de Zaragoza, que se celebra entre o 17 y o 24 d’octubre. Una muestra que replega 25 obras audiovisuals entre largometraches, piezas de ficción, documentals y cortos. A dentrada a todas as proyecciones, que tendrán puesto en o Centro d’Historias (Plaza Sant Agustin, 2) ye libre dica completar aforo.

Tal como afirman en o texto de presentación d’ista nueva edición podremos veyer qualques d’os millors largometraches, documentals y cortos dirichius por mullers que, u bien no han teniu proyección comercial, u bien no han plegau a enguerar-se en Zaragoza. Una edición que tamién ye “mas internacional que no nunca” y a traviés d’as suyas clasicas seccions -“Panorama d’actualidat: Largometrajes de ficción”, “Documentals”, “Aragonesas” y “Cortos en Femenín”-, a XVIII Muestra nos traye proyeccions de gran diversidat cheografica y tematica.

Mientras ista semana nos amanarán a figuras d’a talla de Susan Sontag (Regarding Susan Sontag) a traviés d’un retrato intimo d’a suya vida quan s’han compliu diez anyos d’a suya muerte, y conoixeremos en detalle a la primera alcaldesa d’a Segunda Republica espanyola, l’aragonesa María Domínguez (María Domínguez. A parola libre). Mary Dore nos charrará d’o movimiento feminista estadounidense desembolicau entre 1966 y 1971 (She’s beautiful when she’s angry) y María Galindo nos amostrará qualques d’as iniciativas feministas que son realizando as mullers bolivianas d’o colectivo Mujeres Creando en l’actualidat (13 horas de rebelión).

Silvia Venegas y Juan Antonio Moreno nos presentarán a Sadaf Rahimi, a millor boxeyadora d’Afganistán (Boxing for Freedom), y chunto a Anna Broinowski nos tresladaremos ta Corea d’o Norte ta aprender as artes d’os millors mayestros d’o cine de propaganda. Doris Dörrie nos ferá viachar a la “Espanya d’os anyos setanta” a traviés d’a historia d’Apple y a suya mai hippie Ingrid (Alles inklusive), y Marguerite Abouet ferá lo propio adaptando o suyo comic mas celebre: a historia d’Aya, una choven d’Abiyán, capital de Costa de Marfil, que eixemplifica a vida cutiana d’a choventut africana de finals d’o decenio d’os anyos setanta (Aya de Yopougon).

Gracias a Anna M. Bofarull seremos conscients d’a relevancia d’una malotía tant dura como ye a fibromialgia (Sonata ta violonchelo). Chunto a Ana Lily Amirpour nos adentraremos en a machica atmosfera de Bad City a traviés d’una historia de vampiros que rompe con os estereotipos tradicionals d’iste chenero cinematografico (Una mesacha torna a casa sola de nueitz). Y será Desire Akhavan, directora, guionista y actriz, a encargada de fer a devantadera ista edición con a suya primer largometraje, Appropriate Behaviour, una ácida y dinamica cinta sobre o final d’una relación amorosa lesbica y a busca d’identidat d’o suyo protagonista, una choven irano-americana bisexual y as suyas vivencias en a ciudat de Brooklyn.

A Muestra de Cine Realizau por Mullers de Zaragoza tiene claro que a suya mayoría d’edat -deciueito anyos son ya muitos anyos- no significa unatra coseta que ganas de seguir entabant. En ista etapa d’intensos cambeos socials y politicos, a Muestra tamién ha recibiu una bocanada d’aire fresco en o suyo equipo. Un equipo renovau y choven que conta con l’emparo d’a veteranía de qui han feito d’iste prochecto un puesto de trobada, necesario y imprescindible, en o escenario cultural de Zaragoza. “Gracias a qui estioron, a qui s’incorporan y a qui se van, deixando o suyo poso, ta treballar en a esfensa d’os nuestros dreitos, d’a igualdat y d’a chusticia social. Como siempre en han feito”, adhibe o texto de presentación.

Desfrutemos, un anyo mas, d’a Muestra Internacional de Cine Realizau por Mullers de Zaragoza.
Puetz consultar a programación completa en iste enlaz.

Fuent: http://arainfo.org/2015/10/el-mejor-cine-realizado-por-mujeres-se-reune-en-su-xviii-muestra-internacional-de-zaragoza/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.