Arias Cañete torna a enrestir con un nuevo PHN y menaza con o trescole

O ministro espanyol de Meyo Ambient ha tornau a charrar d'augua "sobrant" y de "solidaridat nacional"

Miguel Arias Cañete (Foto: PP Castiella y Lión)

Miguel Arias Cañete (Foto: PP Castiella y Lión)

O ministro espanyol de Agricultura, alimentación y meyo ambient, Miguel Arias Cañete anunció ahiere que o gubierno ferá un nuevo Plan Hidrolochico Nacional. O suyo obchetivo será ‘guaranciar l’augua de traza solidaria en tot lo territorio t’as necesidatz humanas y t’os ecosistemas’.

As reaccions no s’han feito asperar. O PSOE diz estar preocupau por a posicions cada vegada más trasvasistas que prene o PP. Dende o PAR ha remerau a o PP, que en o pacto de gubernabilidat que os dos partius sinyoron bi apareix un refus esclatero a o trescole de l’Ebro. Chesús Yuste, diputau de CHA y IU en o congreso espanyol diz, en o blog suyo, que ‘Cañete ha amostrau as cartas suyas y bi pencha un troz d’a suya intervención:

‘A unidat de cuenca y os trasvases. Creigo que no son incompatibles os dos principios. A unidat de cuenca y si en sobra d’augua, a cuenca podrá disposar de l’augua que i sobre si existise. Si no existise prou que no. Si no se respetan os caudals ecolochicos prou que no. ¿Pero qué pasa con as auguas que sobran? ¿No se pueden fer servir en un país que pleve prou y tien mala distribución?’

Cañete, antimás, criticó a politica que fació l’anterior gubierno espanyol y dició que amilloraría a coordinación con as confederacions hidrograficas y as sociedatz de auguas. Tamién criticó as desaladoras que, en a suya opinión, no han produciu tanto como s’asperaba.

A Plataforma en Esfensa de l’Ebro ya ha anunciau movilizacions contra una politica que consideran que ye’ esclatero que ye trasvasista’ y avisan que o PP podría fer ‘trasvases d’amagatons’ en cuenta d’os grans trasvases anunciaus quan gubernaba Aznar.

En o país totz os partius politicos han refusau, fueras d’o PP, a posibilidat d’un nuevo trescole d’augua de l’Ebro. O PAR, que gubierna en coalición con o PP en Aragón, por boca d’Alfredo Boné, ha remerau que un nuevo PHN no ye en o pacto de gubierno nacional.

2 Rispuestas a Arias Cañete torna a enrestir con un nuevo PHN y menaza con o trescole

  1. asti un enrastre a una vinyeta a aEsferra sobre isto.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.