O modelo aragonés de medicina de montanya s’exportará ta atros cantons d’a planeta

Dimpués d’anyos de treballo encabezaus por os doctors María Antonia Nerín y José Ramón Morandeira -recientment feneixiu- y de 15.000 euros procedents d’o Gubierno d’Aragón, por fin ha visto a luz o curtometrache ‘Un hospital entre el cielo y la tierra’, que narra todas as experiencias aragonesas en o campo d’a medicina de montanya y o rescate d’accidentaus en altas cotas.

A traviés d’as imachens de Javier Calvo y Sergio Uña, iste zaguer director de fotografía, se i relatan tamién as vivencias d’as expedicions que totz dos doctors, responsables d’o Master de Medicina de Montanya que s’imparte en a Univeridat de Zaragoza, vivioron en as cumbres de l’Himalaya. Agora, gracias a iste curtometrache, o treballo pionero que Aragón ha realizau en iste campo se podrá espardir a la resta d’o mundo. De feito, o modelo de medicina de montanya que se practica en Aragón se levará ta Nepal gracias a la Fundación Pasang Lhamu.

‘Un hospital entre el cielo y la tierra’ cuenta con a participación de montanyers de renombre y d’atros expertos que, a traviés d’imachens ineditas d’alta calidat, cuentan as suyas experiencias en as tucas mas altas d’o mundo. Ta veyer a luz, os responsables d’o film han feito servir una tecnolochía poco habitual que supera en quatro a calidat d’o HD y una mena de soniu ambient definiu como estereofonico. Ye decir, tot un reto tecnolochico que, por agora, ha rematau en exito.

Agora, a ideya prencipal ye levar istas imachens ta meyos y foros especializaus de traza que totz os expertos que lo deseyen puedan conoixer de primera man os abances que s’han rechistrau en ista materia y poder aplicar-los en zonas de tradición montanyera como, por eixemplo, o ya mencionau Nepal.