O nuevo Galaxy se puede controlar con os uellos

Samsung ha presentau de matinada con un espectacular acto en Nueva York l'esperau Galaxy S4

samsung s4Hue de maitinada o fabricante Samsung ha presentau en Nueva York o nuevo Galaxy S4. A presentación ha estau espectacular, en un teatro a on uns quantos actors han representau o que se puede fer en un día con o nuevo telefono d’a marca coreana.

O nuevo mobil estrela de Samsung, que ye muit pareixiu por difuera a o suyo predecesor (ha aumentau a pantalla Super HD AMOLED dica as cinco pulgadas), millora muito as prestacions tecnicas y incorpora un arsenal de nuevas funcions enfocadas a innovar en o control de l’aparato.

Asinas, o Galaxy S4 incorpora funcions como a Smart Pause y a Smart Scroll, dos tecnolochías desembolicadas ta que l’usuario pueda controlar o telefono sin necesidat de tocar-lo. Por eixemplo, existe a posibilidat de controlar-lo con os uellos: si se mira un vidio y aparta a uellada, automaticament o vidio entra en pausa. D’a mesma traza, se puede fer eslizar un articlo, un mensache electronico u una web nomás uellando d’alto ta baixo a pantalla.

Seguindo istas novedatz alazetadas en o control d’o dispositivo, o Galaxy S4 incorpora l’Air View y l’Air Gesture. Se tracta de que a pantalla y l’aparato reconoixcan movimientos y cenyos sin haber de presionar-la. L’Air View ye pareixiu a la S-Pen d’a loseta Noto II, que reconoixe a punta d’o lapiz sin haber de fer presión. Con l’Air View se pueden ixamplar fotografías u acceder a os menús, por eixemplo, sin haber de pulsar a pantalla. L’Air Gesture, por a suya parte, ye capable d’interpretar o movimiento d’a punyo ta interactuar con o mobil.

Apuesta por a fotografía

Samsung tamién s’ha esforzau ta introducir en o Galaxy S4 una aplicación fotografica que aprofite a camara de 13 megapixels. Y l’ha aconseguiu: os usuarios la pueden fer servir de vez con a delantera, de 2 megapixels, y posteriorment mezclallar as fotografías. Amás, se pueden fer servir mientres se fa una trucada ta ufrir un vidio en directo.

Precisament a comunicación y a connexión con as personas ye atro d’os pilars d’o software d’o Galaxy S4. En iste sentiu a companyía ha presentau o Group Play, una opción que permite compartir contenius de traza simultania entre dispositivos Galaxy S4. Por eixemplo, un usuario puede compartir con un contacto una canta, que se reproduce de vez en totz dos aparatos. Y encara millor: Group Play no amenista connexión en internet, ni mobil ni wi-fi, y se puede fer servir con fotos y vidios, tamién.

Unatra función destacada ye o traductor automatico, o S-Translation, que incorpora en todas as suyas funcions. Por agora funciona en pocas luengas, pero fuents d’a interpresa deixoron claro que pretenden aumentar muito o numero d’idiomas.

Caracteristicas tecnicas

L’aparato nomás pesa 130 gramos y tien una amplaria de 7,9 milimetros. O Samsung S4, que plegará t’o mercau a la fin d’abril con dos colors (blanco y negro), trahierá dos procesadors diferents seguntes o mercau: un modelo disposa d’un procesador de quatro nuclios a 1,9 GHz y l’atro, de ueito nuclios a 1,6 GHz. Independientment d’o procesador, incluyirá o sistema Android 4.2.2 Jelly Bean, una memoria RAM de dos gigas y tendrá una capacidat d’almagazenamiento de dica 64 gigas, porque l’aparato ferá honra tamién ta connectar-se a o televisor u ta controlar electrodomesticos. Y a batería se puede extrahier.

Fuent: http://www.vilaweb.cat/noticia/4095471/20130315/galaxy-pot-controlar-ulls.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.