O nuevo hespital de Teruel prencipiará a construyir-se entre mayo y chunio

Contará con un capacidat de 300 leitos. As obras durarán más de quatre anyadas

Infografía d'o futuro hespital (D.Ch.A.)

Infografía d’o futuro hespital (D.Ch.A.)

As obras ta construyir un nuevo hespital en Teruel podrían prencipiar entre mayo y chunio d’ista mesma anyada. Asinas lo ha anunciau iste chueves a directora cherent d’o Servicio Aragonés de Salud (SALUD) María Ángeles Alcutén. Ye previsto d’achustar as obras en bells dos meses y, si no bi hesen alegacions prencipiar-las ta chunio.

O presupuesto ta prencipiar a construyir l’hespital ye de  más de 18 millons d’euros, con lo que o Gubierno d’Aragón diz que “queda esclatera l’apuesta por cunplir a promesa de que Teruel tenese un hespital como se mereixen os teruelanos”.

A interpresa Acciona Infraestructuras será la encargada d’executar as obras que, en total, tienen una valor de 62,2 millons d’euros, y que se prolargarán mientres 54 meses (quatre anyadas y meya). Ista interpresa estió trigada d’entre as más de vinte que se presentoron ta conseguir l’achuste.

O nuevo hespital se devantará en El Planizar de Teruel, un solar que agora acubillará o centro hespitalario y espcios t’a asistencia sanitaria de primer orden, un aparcamiento ta 8000 vehiclos y una zona d’helisuperficie t’o transporte por l’aire. A suya superficie total será de 58.000 metros cuadraus en un edificio “modular, de baixa altaria,y con un minimo impacto visual y ecolochico”.

Ye previsto que o hespital contará con una capacidat maxima de 300 leitos, que 242 serán ta pacients de Medecina Cheneral, Ciruchía y Chinecolochía, 15 ta Obstetricia, 17 ta Pediatría, 14 ta Psiquiatría y 12 en a Unidat de Cudiaus Intensivos. Entre os servicios bi será l’atención ambulatoria, hespitalización, bloque quirurchico y obstetricia, urchencias, radiodiagnosi u rehabilitación.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.