O nuevo permiso de conducir europeu entra en vigor hue

Tien l’obchectivo de reforzar a libertat de circulación, luitar contra fraude y amillorar a seguridat vial

carnetconducir

Eixemplo de nuevo carnet de conducir europeu

Dende hue, totz os nuevos carnetz de conducir expedius en a Unión Europea tendrán a forma d’una tarcheta de credito de plastico, con un formato europeu estandar y mas protección d’a seguridat. O nuevo permiso europeu substituyirá progresivament os mas de 100 modelos diferents de papel y de plastico que en istos momentos fan servir mas de trecientos millons de conductors en toda a UE. A mida forma parte d’a entrada en vigor d’un paquet mas amplo de midas -a 3ª Directiva d’a UE sobre o carnet de conducir- que tien l’obchectivo de reforzar a libertat de circulación, luitar contra o fraude y amillorar a seguridat vial en o conchunto d’a UE.

Actualment, a policía de trafico de toda Europa ha de conoixer mas de 100 tipos diferents de permisos de conducción de papel y de plastico. Ye posible que as fotografías d’identificación haigan quedau antiquadas de fa tiempos, que as categorías t’as que ye autorizau o conductor no sigan claras y que o documento siga facil de falsificar. Os permisos de conducción falsos son una licencia ta matar, por o qual amenistamos uns permisos que sigan facils de leyer y de comprender, y muit dificils de falsificar‘, ha dito o comisario europeu de Transportes, Siim Kallas.

Qué cambeos entran en vigor hue?

1. Un formato europeu estandar.

Totz os nuevos carnetz de conducir europeus s’expedirán sobre a base d’un nuevo formato, o d’una ‘tarcheta de credito’ de plastico, con una fotografía y requisitos estandar sobre a información, facil de reconoixer y de leyer en toda a UE. Totz os nuevos permisos seguirán iste formato dende o 19 de chinero .

Os permisos existents no se veyen afectaus, pero se substituyirán por o nuevo formato en o momento d’a renovación u, como maximo, en 2033. O carnet de conducir europeu puede adaptar-se ta incorporar-ie simbolos nacionals, seguntes lo decida cada estau miembro.

2. Mas seguridat.

O nuevo carnet de conducir incluye una serie de midas de seguridat ta que no pueda estar manipolau y ta evitar-ne a falsificación.

Amás, ye refirmau por a creyación d’un sistema europeu d’intercambeo de datos electronicos, ta facilitar l’intercambeo d’información entre as administracions d’os estaus. D’ista traza se simplificará o proceso de chestión d’os carnetz de conducir t’as personas que cambean a suya residencia d’un estau miembro ta unatro. Tamién ferá honra ta viedar o ‘turismo de carnet de conducir’ y o fraude, por eixemplo, a mesa en practica d’una privación muito mas estricta ta evitar que un estau miembro expida un permiso a belún a qui unatro estau miembro le’n ha retirau, suspendiu u restrinchiu o permiso.

3. A renovación periodica d’os permisos.

Ta luitar contra o fraude y amillorar a seguridat viaria ye clau una renovación periodica d’os permisos en toda a UE. Con as nuevas normas, os permisos ta conductors d’automobils y motocicletas s’han de renovar cada 10 u 15 anyos, en función de cada estau miembro. Por o que fa a os permisos ta conductors d’autobuses y cambions, s’han de renovar cada cinco anyos y ferá falta una reconoixencia medica t’a renovación. Ye una renovación administrativa que no amenista prebas adicionals. D’ista traza se guarancia que a información, as fotos, etc., se mantienen actualizadas, que se puedan actualizar periodicament as midas de seguridat d’as tarchetas en función d’a evolución tecnolochica, y que os estaus miembros disposen d’información actual sobre os permisos en circulación.

4. Protección d’os conductors vulnerables.

O rechimen d’o carnet de conducir europeu reforza a protección d’as categorías mas vulnerables d’usuarios d’a vía publica, y bi incluye os puntos venients:

Una edat minima mas alta ta l’acceso dreito (a traviés de prebas practicas y teoricas) a os permisos t’as motocicletas mas potents, d’os 21 actuals a os 24.

Amás de l’aumento d’a edat minima, introducción de trangos adicionals en o proceso enta un acceso progresivo. O nuevo rechimen exiche una experiencia de conducción d’un minimo de quatro anyos (en cuenta de dos) con motocicletas menos potents antes de no expedir un permiso t’as mas potents.

Os ciclomotors constituyen una nueva categoría de vehíclo y s’exichirá dende agora a os candidatos a un permiso de ciclomotor que superen una preba de control de conoiximientos. Os estaus miembros tamién podrán introducir-ie prebas de control de capacidatz y de comportamiento, asinas como reconoiximientos medicos. A UE estableixe una edat minima recomendada de 16 anyos t’a reconoixencia mutua d’os permisos por parte de totz os estaus miembros (os estaus miembros pueden reducir ista edat a 14 anyos en o suyo propio país). Antis no i heba requisitos minimos en a UE t’os ciclomotors.

5. Normas minimas t’os examinadors d’o permiso de conducción.

Os examinadors d’o permiso de conducción habrán de cumplir unas normas minimas por o que fa a la suya calificación inicial y a la formación periodica. Ista mida introducirá un control de calidat a o nuevo sistema.

A Directiva 2006/126/CE sobre carnetz de conducir estió adoptada por os estaus miembros y o Parlamento Europeu en 2006. Os estaus miembros heban de transposar-la antis d’o 19 de chinero de 2011 y se convierte en plenament aplicable o 19 de chinero de 2013.

Fuent: http://www.vilaweb.cat/noticia/4075378/20130119/permis-conduir-europeu-entra-vigor.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.