O PAR creya una comisión interna ta “afundar en l’aragonesismo”

A colla de treballo naix con os obchetivos de afundar en o sentiu d'identidat colectiva d'os aragoneses y de meter por debant os intreses d'Aragón en os debatz politicos

6 enero, 2013 | Politica | Autor: Arredol | Tweet

Reunión d’a comisión (Foto: PAR)

O Partiu Aragonés (PAR) ha creyau una nueva comisión interna sobre aragonesismo que tenió a suya primer reunión iste sabado a on que estió present Arturo Aliaga, Secretario Cheneral d’a formación. Ista colla de treballo naix con l’obchetivo de “afundar en o sentiu d’identidat propia y colectiva d’os aragoneses y, a ran politico, adempribiar os intreses d’Aragón en qualsiquier debat, iniciativa u negociación”.

O president d’a comisión, Miguel Ángel de Castro, ha explicau que ista colla de treballo prebará de “enfortir os nuestros sinyals d’identidat, a nuestra cultura como rasgo entre los aragoneses, desembolicar a ideyolochía, pensamiento y discurso policiticos d’o PAR, estimular o debat y la participación politica y creyar esmo de lo aragonés”.

O PAR preba tamién asinas de “desembolicar a suya ideyolochía de traza alazetal en a ciudat de Zaragoza, a on que o PAR tien menos refirme”. A comisión tamién quier “creyar y teixer un rete social aragonesista, que sirva d’altavoz a las iniciativas d’o partiu”, seguntes diz De Castro.

Entre as accions que en los venients meses desembolicará la comisión se troba a realización de documentos sobre as trenta anyadas d’autonomía u sobre l’aragonesismo t’a ciudat de Zaragoza, chornadas sobre identidat aragonesa, aragoneses ilustres u a recuperación d’as chornadas “El PAR en la calle”, viaches y cursas ta puesto sinyalers, coferencias u mesas redondas sobre afers d’actualidat.