O parlamento britanico refusa ir a la guerra contra Siria

Os diputaus reclaman prebas concluyents de l'emplego d'armas quimicas en Siria pa dar "luz verda" a una intervención militar

David Cameron (Foto: North Ireland Assembly)

David Cameron (Foto: North Ireland Assembly)

A Camara d’os comuns refusó a proposa d’o gubierno britanico d’un ataque a Siria como respuesta a o presunto uso d’armas quimicas por parte d’o gubierno. D’os diputaus, 285 votoron en contra d’a proposa y 272 a favor. Entre os diputaus que votoron en contra, n’i heba de conservadors y de democratas liberals, que refirman a la coalición d’o gubierno. Qualques diputaus conservadors estioron especialment duros con a proposa d’o suyo chefe de filas.

A moción presentada por o gubierno y redotada afirmaba que a intervención armada s’autorizaría en una nueva votación en o parlamento.

Si bien a prencipio de semana s’especulaba con un ataque imminent contra Siria, o gubierno de Cameron dio un trango ta zaga y en a moción debatida o chueves en a Camara d’os comuns charraba d’intervención armada, pero la condicionaba a una segunda votación en o parlamento, probablement a semana venient.

A decisión de Cameron pretendeba contentar a la oposición laborista, que mesmo asinas ha decidiu de votar-ie en contra. O texto asegura que fa falta una respuesta humanitaria fuerte por parte d’a comunidat internacional debant d’o supuesto uso d’armas quimicas, que ‘puede incluir, si cal, accions militars legals, proporcionadas y centradas en salvar vidas y prevenir l’uso d’armas quimicas en Siria en o futuro’.

A moción de Cameron tamién pide que o Consello de Seguridat d’a ONU pueda valurar decamín as prebas que replegan istes días os inspectors desplegaus en Siria. ‘S’han de fer totz os esfuerzos posibles pa guaranciar o refirme d’o Consello de Seguridat a l’acción militar antes d’emprender-la, y antes de qualsiquier actuación britanica, s’habrá de votar en a Camara d’os comuns’, indica.

O gubierno britanico se compromete asinas a fer un poder por tener o refirme d’o Consello de Seguridat d’a ONU, pero admite de vez que podría actuar sin o refirme de Rusia y China. De feito, o mesmo Cameron ha asegurau que l’asesoramiento legal que ha recibiu indica que una intervención militar difuera d’o marco d’a ONU se podría chustificar por razons humanitarias. A oposición britanica, manimenos, s’oposa a ista lectura, y exiche mas prebas y mas tiempo antes d’autorizar un ataque.

A pantasma d’Irak

Entre a intervención en Westminster, o primer ministro britanico, David Cameron, ha quiesto remarcar as diferencias entre Siria y Irak. ‘Soi muit conscient d’as licions d’os conflictos anteriors, y en particlar d’as preocupacions d’iste país en relación con o que estió mal en  a guerra d’Irak en 2003’, ha asegurau.

‘Pero isto no ye como Irak. O que pasa en Siria ye fundamentalment diferent. No somos invadindo un país. No buscamos armas quimicas u biolochicas. O que se pide en zaguera instancia, y digo zaguera instancia porque ferá falta atro voto en a camara, ye emparo pa una acción’, ha dito. Seguntes Cameron, ‘no i hai garra dubda que o gubierno sirio tien armas quimicas y las ha emplegadas’.

Fuent: http://www.vilaweb.cat/noticia/4140995/20130830/parlament-britanic-rebutja-anar-guerra-siria.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.