O parlamento catalán reconoixe o dreito a decidir de Arán

D'aquí a seis meses se ferá una consulta ta que os araneses voten sobre o nuevo rechimen especial

Foto: Vilaweb

Foto: Vilaweb

O pleno d’o Parlamento de Catalunya aprebó ahiere a lei de rechimen especial d’Arán, con o refirme de todas las collas parlamentarias, fueras de Ciutadans y, en bell articlo, o PP. O documento reconoixe a realidat nacional occitana d’a val, estableixe os dreitos historicos y a identidat d’Arán y le otorga o dreito de decidir o propio futuro. Tamién fixa un tiempo de tres anyadas ta revisar bilateralment, con a Generalitat, o modelo de financiación.

Satisfacción d’o sindico mayor

A oposición de PP y Ciutadans se basó más que más en o reconoiximiento que a lei fa d’o dreito a decidir d’a Val d’Aran. Precisament, iste punto estió un d’os que se votó separadament y, quan estió aprebau, consiguió un firme aplauso, tanto d’os diputaus como d’os convidaus que bi heba en a tribuna.

O sindico mayor d’Arán, Carles Barrera, yera una d’as personalidatz presents en a tribuna de l’hemiciclo. A la fin, no s’adubió de demostrar a satisfacción por l’aprebación d’a lei. Dició que ahiere se cumpliban as lechitimas aspiracions d’os araneses, porque a lei reconoixe a identidat propia d’Arán adintro de Catalunya y le da o dreito de decidir o futuro: «As collas parlamentarias catalanas tienen más que interiorizau l’exercicio d’o dreito de decidir. Entendemos que en un estau democratico totz han de tener libertat ta decidir y opinar sobre o tema que les pareixca. Iste dreito no se puet negar a dengún».

Reconoixedura d’o caracter nacional y financiación revisable

A lei reconoixe a realidat nacional occitana, dotada d’identidat cultura, historica, cheografica y lingüistica; estableixe un rechimen especifico t’a Val d’Arán que proteche o caracter singular, os dreitos historicos y a capacidat de decidir as trazas d’estructurar-se institucionalment. Tamién i replega a división territorial d’Arán en seis terçons, reconoixe o sinyal, l’escudo, a fiesta y l’himno y estableixe l’aranés como luenga d’emplego preferent en l’administración.

A millora d’o sistema de financiación queda pendient. As disposicions adicionals fixan un termino de tres anyadas t’a revisión, que habrá d’estar pactada entre a Generalitat y o Consello d’Aran. Asinas mesmo, queda pendient de resolver-se a lei electoral propia, que s’habrá d’estructurar a partir d’a división d’o territorio en terçons.

 Consulta d’aquí a seis meses

Os araneses tendrán a zaguer parola sobre a nueva lei, que sustituye a l’actual, vichent desde 1990. D’aquí a seis meses se i ferá una consulta popular no refendaria, siempre que o Tribunal Constitucional espanyol acabe devantando a suspensión d’a lei de consultas catalana. Si contina suspendida, caldrá mirar una alternativa, como ya se fació o 9 de noviembre con a que heba d’estar a consulta sobre a independencia.

Fuent: http://www.vilaweb.cat/noticia/4228177/20150122/parlament-reconeix-dret-decidir-laran.html

Una rispuesta a O parlamento catalán reconoixe o dreito a decidir de Arán

  1. Pingback: O parlamento catalán reconoixe o dreito a decidir de Arán | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.