O Parlamento d’Ucraína destituye a Yanukovich, que denuncia un golpe d’estau

O Parlamento ha designau a Turchinov, d'a oposición, nuevo primer ministro en funcions. A extrema dreita prene as carreras de Kiev

Viktor Yanukovich. Foto: premier.gov.ru (CC-BY)

Viktor Yanukovich. Foto: premier.gov.ru (CC-BY)

O Parlamento d’Ucraína ha alcordau de destituir a o president, Viktor Yanukovich en a sesión celebrada huei, amás de convocar eleccions pa lo venient 25 de mayo. A oposición ha preso o control d’a cambra lechislativa mientres Yanukovich albandonaba Kiev de nueitz pa marchar ta Kharov en l’este d’o país.

Entremistanto, a policía ha deixau as carreras y collas d’extrema dreita armadas han preso o control d’as mesmas en a capital ucrainiana, incluindo os accesos a os edificios de l’administración de l’estau, parlamento, siede gubernamental y edificio presidencial incluius. Asinas mesmo, istas collas faixistas han preso a residencia d’o campo de Yanukovich en Mezhigorie, a 20 km. de Kiev.

Asinas mesmo s’han denunciau ataques a siedes d’o Partiu Comunista, asinas como menazas y ataques a la comunidat chodiga ucrainiana por parte d’istas collas faixistas.

Yanukovich dende Kharov ha denunciau que o Parlamento heba “preso midas ilegals“, declarando que no iba a dimitir estando un president democraticament esleixiu, considerando a situación un “golpe d’estau“. Yanukovich podría fablar a la nación ista nueit dende a televisión nacional, seguntes un portavoz gubernamental.

Oleksander Turchinov, vicepresident d’o prencipal partiu d’a oposición, o partiu de Yulia Timochenko, liberada d’a garchola por o Parlamento, ha estau designau nuevo president d’a cambra, dimpués de dimitir por problemas de salut Vladimir Ribak, socio de Yanukovich. Asinas mesmo, Turchinov ye o nuevo primer ministro interino.

L’alcuerdo alcanzau ahiere entre Yanukovich y a oposición ha quedau a la fin sin valor debiu a la presión d’a extrema dreita, que demandaba a dimisión d’o president ucrainiano en menos de dotze horas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.