O Parlamento escocés apreba a lei que permitirá o referendum d’independencia

O diya 18 de setiembre se realizará o referendum d'independencia d'Escocia, dimpués d'aprebar-se a lei que permitirá a consulta

Interior d'o Parlamento escocés. Foto: Mogens Engelund (CC-BY-SA)

Interior d’o Parlamento escocés. Foto: Mogens Engelund (CC-BY-SA)

Por unanimidat de totz os grupos parlamentarios, s’ha aprebau en o Parlamento escocés o prochecto de lei que permitirá de realizar un referendum pa que o pueblo escocés pueda decidir sobre a suya independencia d’o Reino Uniu.

O diya 18 de setiembre ye prevista a celebración de dita consulta, que tendrá a pregunta: “Escocia habría d’estar un país independient?“. A viceprimer ministra escocesa, Nicola Sturgeon, ha declarau que o futuro d’Escocia yera en as mans d’o pueblo escocés por primer vegada en 300 anyos y que o suyo gubierno “creye que a independencia beneficiará a tot o mundo en ista nación y que prener as decisions aquí pa la chent que vive y treballa aquí nos aduyará a creyar una sociedat mas chusta y mas prospera“.

Ista lei yera precedida d’un alcuerdo entre o Gubierno escocés y o Gubierno britanico pa poder celebrar a consulta independentista, mediant lei aprebada por o Parlamento escocés.

Seguntes a lei aprebada se realizará una campanya de deciséis semanas antes de celebrar-se o referendum. O referendum será supervisau por una comisión electoral independient y cumplirá con totz os requisitos internacionals.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.