O Parlamento espanyol apreba de forma definitiva a reforma laboral

A mayoría absoluta d'o PP, chunto a CiU, UPN y FAC consiguen aprebar en o Parlamento espanyol a reforma laboral

Fátima Báñez. Fuent: Ministerio de Treballo

O Partiu Popular (PP) ha consiguiu aprebar en o Congreso d’os Diputaus espanyol a reforma laboral gracias a o refirme de Convergència i Unió (CiU), Unión del Pueblo Navarro (UPN) y Foro Asturias (FAC), amás d’a mayoría absoluta que tienen os populars en a camara baixa. D’ista forma, y dimpués d’haber pasau por o Senau, s’apreba o texto finitivo d’a Lei d’a Reforma Laboral, con bellas esmiendas aprebadas que han estau presentadas por os propios populars u pactadas con CiU.

Entre as modificacions a o texto orichinal, cal fer constar a prioridat en a contratación de victimas d’o terrorismo y de violencia domestica, a limitación d’a vichencia d’o contracto d’emprendedors mientres l’ature puye d’o 15%, que permite o despiu libre mientres o primer anyo de contracto, u a exclusión d’o despiu por absentismo d’enfermedatz graus, cancer u enfermos cronicos.

A resta de partius en o Congreso, ha votau en contra d’a lei, con amplas criticas. S’ha criticau a falta de negociación y de consenso mientres a tramitación d’a lei, incorporando-ie bellas esmiendas que no cambean brenca d’os alazetz d’a lei. S’ha criticau que as cifras d’ature continan puyando, con o que consideran “desmontau” uno d’os argumentos que levó a o Gubierno a fer a lei, amás de criticar tamién o “poder absoluto” d’os interpresaires, a baixada d’os chornals d’os treballadors y a precarización d’as condicions laborals. Dende Izquierda Plural, s’ha animau a la resta de partius en a oposición a recurrir chuntos a lei en o Tribunal Constitucional.

A reforma laboral s’aprebó de forma urchent a prencipio de 2012 meyant un Reyal Decreto-Lei por o gubierno de Mariano Rajoy y se fació en respuesta una vada cheneral estatal tanto por os sindicatos mayoritarios como por os minoritarios o 29 de marzo. Manimenos, a lei ha continuau o suyo tramite por Congreso y Senau dica que hue s’ha aprebau de forma finitiva, gracias a la mayoría absoluta d’o PP en totz dos camaras parlamentarias, mientres os esferents sindicatos continan con campanyas en contra d’a reforma.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.