O Parlamento griego apreba o tercer rescate financiero d’o país

L'alcuerdo con Bruselas ta un tercer rescate ye aprebau con 229 votos a favor, 64 en contra y seis abstencions

Alexis Tsipras. Foto: FrangiscoDer (CC-BY-SA 3.0)

Alexis Tsipras. Foto: FrangiscoDer (CC-BY-SA 3.0)

Alexis Tsipras aconsiguió o suyo obchectivo de quitar entabant en o Parlamento l’alcuerdo con a troika que permitirá d’iniciar as negociacions ta un durismo tercer rescate d’a economía. Pero lo fació dimpués de sufrir una fuyida de votos en o suyo propio grupo parlamentario mayor de l’asperada. 38 diputaus le abandonoron: 32 en votoron en contra y seis se’n abstenioron. Unatro mas no se presentó a votar.

En os zaguers días s’heba dito que os diputaus de l’ala ezquierda d’o partiu, agrupaus en a corrient Plataforma d’Ezquierdas, s’oposarían a l’alcuerdo. Ixa trentena de parlamentarios nunca no iba a acceptar un pacto pareixiu a o que Syriza refusó en o referendum. A la fin, a cifra de rebeldes fue mayor, y entre ells yera o exministro de Finanzas Yanis Varufakis.

 L’alcuerdo s’aprebó con 229 votos a favor, 64 en contra y seis abstencions. O resultau fue claro, pero solament porque tres partius d’a oposición –o conservador Nueva Democracia, o liberal Potami y o socialdemocrata Pasok– unioron os suyos 106 diputaus a las filas de Syriza en a votación, a lo menos a os parlamentarios d’o partiu en o Gubierno que siguioron a o suyo lider.

Tsipras queda en una posición feble, pero seguirá estando primer ministro. Panagiotis Lafazanis, ministro d’Enerchía y lider d’a corrient ezquierdista, dició dimpués d’a votación que “aquells de nusatros que hemos votau no continaremos emparando a o Gubierno y os suyos esfuerzos ta salir d’a crisi”. Tsipras mantendrá o suyo Gubierno de coalición con o partiu conservador Anel –os suyos 13 diputaus i votoron –, pero ye posible que saque d’o Gabinete a os ministros y viceministros que no emparoron l’alcuerdo, como Lafazanis.

A situación dentro de seis meses u un anyo, quan se sufran as conseqüencias socials y economicas d’o zaguer rescate, puede estar muit diferent.

En o debat previo, Tsipras intervinió a la fin en un zaguer intento de convencer a totz os representants d’o suyo partiu. Les dició que a sola alternativa consistiba en acceptar a salida traumatica d’a eurozona, que ye o que pretendeba o ministro alemán de Finanzas, Wolfgang Schäuble. Ixo no convenció a las suyas criticas, tampoco a la presidenta d’o Parlamento, Zoe Konstantopoulou, que intervinió ta qualificar l’alcuerdo de “chenocidio social“. 

Konstantopoulou delegó en o vicepresident a dirección d’o pleno, porque o sector mayoritario de Syriza no se fiaba que dilatase o tramite parlamentario.

L’alcuerdo heba d’aprebar-se antes d’as 12 d’a nueit d’o mierques (sin precisar si yera a hora de Bruselas u a d’Atenas), pero a votación no remató dica pasada a 1 d’o maitín, hora de Grecia. Hue de maitins, s’ha reuniu o equipo tecnico de l’Eurogrupo, por baixo d’o livel de ministros de Finanzas, ta valurar a decisión d’o Parlamento y proposar l’inicio d’as negociacions formals t’o tercer rescate.

Fuent: http://www.eldiario.es/internacional/Tsipras-diputados-votacion-acuerdo-troika_0_409809027.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.