O Parque Nacional d’Ordesa menazau por a producción hidroelectrica

A organización SEO/BirdLife denuncia que en o Parque Nacional d'Ordesa quieren implantar-se-ie minicentrals hidroelectricas en as cabeceras de ríos y arrigachuelos

O Consello d’Ordinación d’o Territorio aprebó a zaguers de 2011 a posibilidat de permitir aproveitamientos hidroelectricos unius a la chestión d’o Parque Nacional. Debant d’ista decisión a organización SEO/BirdLife denuncia que no s’ha presto cuenta en a frachilidat d’as valors naturals vinculadas a la cabecera d’os ríos y arrigachuelos de montanya, que han estau preservaus mientres decenios gracias a la figura de protección de Parque Nacional. A chestión d’o Parque Nacional debe contemplar alternativas destinadas a proporcionar suministro electrico, sin necesidat d’a construcción y encete de prochectos de minicentrals. O plan director d’os parques nacionals ye claro en iste sentiu, advogando por a eficiencia enerchetica fendo servir fuents d’enerchías renovables.

De forma prioritaria han d’estudiar os consumos y a necesidat real d’os mesmos, tenendo siempre como obchectivo prencipal a conservación d’as valors d’o Parque Nacional. Amás, caso de que realment calese o suministro y no estase posible o suyo transporte, s’han d’estudiar fuents d’enerchía renovables, cheneradors u atros, como en l’actualidat s’instalan en bordas y cubillars de montanya por tot o Pirineo, descartando l’aproveitamiento hidroelectrico por o suyo impacto ambiental.

Amás d’estricallar habitats protechius d’alta valor ecolochica, a instalación d’istas minicentrals hidroelectricas podría suposar a desaparición d’a zaguera especie descubierta en Ordesa, a granota pirinenca

Valors ambientals y prioridatz d’o Parque Nacional

Ta SEO/BirdLife a dirección d’o Parque Nacional d’Ordesa debe priorizar a conservación d’as valors naturals que levoron a la declaración d’iste espacio con a maxima figura de protección y evitar l’acotole d’especies como ocurrió en o pasau con o bucardo u l’urogallo. En l’actualidat o Parque Nacional no cuenta nian con un programa educativo, a diferencia d’a resta d’os parques nacionals d’o estau; no disposa d’un Plan Rector d’Emplego y Chestión actualizau, que no permite ista mena d’aproveitamientos, (o present ye de 1995) y no ha aprebau mientres as lechislaturas pasadas o necesario ixample d’a Reserva d’a Biosfera (declarada en 1977).

Fuent: http://arainfo.org/2012/07/el-parque-nacional-de-ordesa-amenzado-por-las-hidroelectricas/

Una rispuesta a O Parque Nacional d’Ordesa menazau por a producción hidroelectrica

  1. Un gubierno que no cudia o meyo ambient y a suya naturaleza ye fidel refleixo de o que aspera d’a suya tierra…aprofeitar-se y hoder-los.

    ¿Ye o no ye ta cremar lo pignatelli d’una vez?

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.