O Patronato d’o Parque Natural d’o Moncayo apreba o plan d’actuación ta 2013

O presupuesto ye de 1.379.000 €. A DPZ destinará antimás 500.000 € a lugars afectaus por o fuego de agosto

Reunión d'o Patronato (Foto: DPZ)

Reunión d’o Patronato (Foto: DPZ)

A Chunta Rectora d’o Patronatod’o Parque Natural d’0 Moncayo ha aprebau o suyo programa d’actuacions t’a venient anyada que plega dica 1.379.000 €, un d’os más grans que ha teniu, en a reunión celebrada iste martes en a localidat de Talamants.

A trobada ye estada presidida por o president d’o Patronato y d’a DPZ, Luis María Beamonte, o director cheneral de Conservación d’o Meyo Natural d’o Gubierno, Pablo Munilla, y l’alcalde de Talamants, Jose Manuel Jiménez.

Ta fer as actuacions previstas en 2013 en o Parque Natural d’o Moncayo, o Gubierno d’Aragón i alportará a cantidat de 594.000 € y a DPZ contribuyirá con 785.000 €, que  385.000 en pertocan d’o convenio que D.Ch.A. y DPZ sinyoron ta 2012 y que bi incluye o soterramiento d’a linia de baixa tensión d’0 campamento de Moncayo y l‘amillora d’o gudrón d’o trampo de Litago t’o parque Natural.

As actuacions previstas t’o nuevo convenio a formalizar t’o 2013, a on que a institución provincial alportará una cantidat parellana, comprenderán l‘acondicionamiento d’o vial entre Lituenigo y a redolada d’o Parque d’o Moncayo, igual como atras actuacions que restan por determinar.

Seguntes ha manifestau o director cheneral de Conservación d’o Meyo Natural, Pablo Munilla, “a DChA contina con a inversión ta cumplir os compromisos que prenió con os sindicatos en agosto de 2012, y contina con a misma linia de subvencions t’os concellos d’a redolada”.

Luis María Beamonteha destacau que “o compromís d’a DPZ ha iu dillá d’actuacions punctuals en os lugars afectaus por os incendios d’o Moncayo” y ha adhibiu que “a cobertura d’as actuacions plegará t’atros espacios naturals como Chiprana u Gallocanta“.

“Con istas intervencions queda contrimostrada a sinerchia entre dos administracions en un espacio como en ye o Parque Natural d’o Moncayo”, ha sinyalau Munilla.

Incendio de Talamants

En ha reunión d’o patronato tamién se i ha charrau d’o Plan de Restauración d’o Parque con a enchaquia d’o incenció que bi habió en a redolada en o mes d’agosto. En total estioron 4.675,11 as hectareas afectadas por o fuego; 400 de superficie agricola y a resta de forestal. En o Plan de Restauración bi ha una serie d’accions a fer ta restaurar a cubierta vechetal, correchir a erosión y amillorar as infraestructuras.

O Gubierno ha demandau que se incluiga o incendio de Talamants en o Reyal Decreto que s’aprebó en noviembre, a on que s’apreboron midas urchents ta paliar os mals producius por os incendios forestals y atras catastrofes naturals. Cuanto a iste afer se’n ferá una reunión en Madrid o 11 de aviento.

A DPZ transferirá 500.000 euros en os venients diyas a bells municipios afectaus por l’incendio d’o pasau mes d’agosto, ta fer-ie bellas intervencions en balsas y entibos y t’adequar a pista entre Talamants y Alcalá. A institución ya se comprometió fa tiempo a adequar bells 200 kilometros de camins rurals afectaus en l’inte que a DChA faiga a limpieza d’os monts.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.