O PCE y Ganemos Zaragoza

Samuel Gimeno

Samuel Gimeno

Samuel Gimeno

Dende agosto un grupo de personas de diversas organizacions politicas y movimientos socials con atros ciudadans que no heban participau antes en politica, totz unius por una ideya común: fer una candidatura municipalista a o concello de Zaragoza en a qual os candidatos isen esleius por meyo de primarias ubiertas, complisen un codigo etico estricto de comportamiento y o programa y as decisions post-electorals isen esleius de traza mancomunada entre totz os miembros d’a plataforma.

A mía ideya personal ye que Ganemos Zaragoza estase un Candidatura d’Unidat Popular an que estasen representadas todas as personas que queresen un cambeo real en o Concello de Zaragoza, con una actuación parellana a las diversas CUP de Catalunya. As CUP catalanas levan dende 1979 fendo municipalismo dende quasi as mesmas posicions que s’esfienden agora dende Ganemos Zaragoza.

En as diversas asambleyas y chornadas decisorias a la fin as friccions siempre saliban a relucir entre miembros de Cucha Unida y/u PCE y a resta de l’asambleya. Cal dicir que i heba miembros de IU que se miraban d’apaciguar os animos y as desconfianzas, pero a la fin dende o PCE y os sectors mas oficialistas d’IU quitaban a relucir o suyo comportamiento antidemocratico y o porqué dende 1977 nunca no han estau capables de conformar una mayoría transformadora que cambee o estau y os concellos de verdat.

O PCE s’estima más de chestionar miserias y 3 concellalías que de fer parte d’un cambeo real y transformador d’a nuestra sociedat. No niego que no i haiga miembros que no lo deseyen pero a suya connivencia y emparo enta atros sectors que no, les delata. se miran más de continar comodos en os suyos estudietz d’a carrera Mayor u d’o concello que no de tacar y enfrontinar a las remoras internas d’a suya organización.

O PCA tenió en os anyos setanta a o suyo millor secretario cheneral en os zaguers 40 anyos, Vicente Cazcarra. Que un hombre tant integro y honesto como ell rematase defenestrado en 1979 y no tornase ta Aragón diz muito d’o PCE, d’o d’alavez y de l’actual. Ya que quasi dengún hue en Aragón s’alcuerda d’ell y a suya memoria ha estau borrada. Recomiendo leyer o libro “Aragón, o rechionalismo d’os comunistas” de Guara editorial an que Javier Delgado pregunta a Vicente Cazcarra sobre diversas qüestions tanto politicas como economicas u culturals y fabla d’o colonialismo interior que padeixe Aragón por parte d’o Estau espanyol ta remerar a un d’os millors militants comunistas que ha dau Aragón.

A os militants d’o PCE reticents a la participación d’o suyo partiu en Ganemos Zaragoza por “diluir-se” y “cayer en mans de vaiga vusté a saber quí”, les remero o punto 24 d’o programa electoral de 1977 con o qual o Partiu Comunista d’Espanya se presentó: “Democratización d’a vida municipal, con a participación de vecins por meyo d’as suyas organizacions autonomas, ciudadanas y de vico”. Ixo y brenca mas que ixo ye o que queremos en Ganemos Zaragoza.

En Ganemos Zaragoza queremos saber si o PCE ye disposau a sozmeter a o pueblo y a o que iste decida u por contra va a continar con as suyas practicas manipuladoras d’os zaguers 40 anyos, tal como veyemos totz en l’asambleya d’o pasau martes an que se mandó a una serie de personas a votar una opción que estió a contraria d’a qual o PCE heba acceptau y consensuado dimpués de muito debat d’entre totz os miembros de Ganemos Zaragoza en a chornada de debat d’o sabado anterior.

O PCE ha de esleir entre quedar con 3 concellals y chestionar a miseria u por contra participar en una plataforma municipalista que sobreixca y faiga por fin o cambeo que deseyatz y levatz en o programa dende 1977.

O PCE tiene hue una responsabilidat historica que complir con totz os suyos militants que luitoron en os 70 por un cambeo y se podrioron en garcholas y comisarias franquistas como muitos atros militants de cucha. Porque si no, o panorama ye un concello d’o PP con desahucios diarios, chent rechirando minchada en a vasuera frent a la vuestra siede d’a carrera Mayor y en muitos atros puestos, servicios socials colapsaus, ciclistas acazaus como delincuentes, un concello sin transparencia y sin participación en as decisions que se prenan en ell por parte d’os ciudadans.

De vustés depende que Ganemos Zaragoza sía o que ha estau siempre u que s’estricalle ta cutio.

Si lo estricallan contrimostrarían que un burgués espantau de dreitas remataría votando a o faxismo y un burgués espantau de cuchas remataría

provocando una victoria electoral d’a dreita.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.