O perimetro d’o incendio de Cinco Villas controlau

O fuego contina activo en diferents puntos encara que millora a situación a l'aspera de tener-lo de tot controlau

Foto: Miguel Ángel Conejos (AraInfo)

Foto: Miguel Ángel Conejos (AraInfo)

A nueit d’o domingo a o lunes ha resultau positiva por o que fa a l’obchectivo d’extinción d’o incendio declarau en o termin municipal de Luna iste sabado, que ha afectau ya a 13.500 hectarias seguntes fuents oficials.

O incendio contina activo, pero estabilizau y evolucionando positivament, seguntes ha informau o consellero de Presidencia Vicente Guillem a os medios de comunicación. En a reunión mantenida hue por Guillem con o consellero d’Agricultura, Joaquín Olona s’ha alcordau o realoixo a os 230 vecins d’Asín y Orés.

Tecnicos y Achents de Protección d’a Naturaleza (APN) y Brigadas de Refuerzo pa Incendios Forestals (BRIF), aseguraban de maitins hue que o perimetro heba estau controlau mientres a nueit. Asinas l’ha asegurau tamién o Gubierno d’Aragón.

A tamás d’os relevos y a retirada de qualques efectivos, en a nueit d’o domingo a o lunes i ha treballau 300 efectivos, y entre a chornada de hue será mas de 400, emparaus por dos hidroavions y entre 6 y 12 helicopters.

Reaccions a l’incendio

A población d’a zona afectada no ha deixau de recibir a solidaridat, en forma de mensaches en os retz socials, dende distintos puntos d’Aragón.

En o mesmo sentiu, tot l’abanico de partius politicos y muitismas asociacions han amostrau o suyo malestar por l’incendio que suposa una autentica esferra medioambiental, y a perda de bestiar y cultivos d’a zona.

Izquierda Unida (IU) amostraba a suya solidaridat con os vecins  y vecinas afectadas, amostrando toda a suya reconoixencia a qui treballa por a extinción de l’incendio. En nota de prensa IU reclamaba tamién que s’incluiga a protección d’os animals en o Protocolo d’Emerchencias pa permitir a os servicios d’emerchencia soltar a os animals y pa privar que mueran a conseqüencia de l’incendio.

Quantos diputaus de Podemos se desplazaban en o maitín d’o domingo t’a zona afectada pa amostrar o suyo refirme a os habitants d’a zona y a os equipos d’extinción, y conoixer de primera man a magnitut de l’incendio.

José Luis Soro, de Chunta Aragonesista (CHA), tamién visitaba Biota y Uncastiello entre a chornada de domingo pa amostrar a suya preocupación y solidaridat, dimpués d’haber estau nombrau consellero de Vertebración d’o Territorio, Mobilidat y Vivienda d’o Gubierno d’Aragón.

Puyalón de Cuchas tamién amostraba a suya solidaridat con as poblacions asoladas por l’incendio, y deseyaban que os treballos d’extinción se desenrollasen o millor posible. Lanzaban tamién un afectuoso saludo a os bombers forestals, a qui daban gracias por o suyo titanico treballo, y solicitaban templanza y coordinación en os treballos pa no arrisgar a seguranza d’istes equipos d’extinción.

Fuent: http://arainfo.org/2015/07/el-perimetro-del-incendio-de-cinco-villas-controlado/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.