O periodismo dichital repensó a profesión en Uesca

Piluca Escamilla

Congreso de Periodismo de Uesca (Foto: http://www.congresoperiodismo.es)

Congreso de Periodismo de Uesca (Foto: http://www.congresoperiodismo.es)

 

En menos d’una quartalada a etiqueta #CongresoHuesca plegó ta Trending Topic en Twitter y asinas remanió mientres tot o diya, dentre as cosas más comentadas por os internautas. Un anyo más, y ya en fan quatorce, Uesca ha esdeveniu o centro d’o Periodismo Dichital gracias a lo congreso que mientres dos diyas aplega en a ciudat a profesionals y estudiants d’os meyos ta compartir, debatir y comentar a situación d’os meyos dichitals en o mundo.

Trescientas cinquanta presonas armadas con tabletas, portatils y movils, plegadas dende totz os puestos d’o mundo, estriporon a situación d’una profesión que, en plena crisis economica, vive un d’os suyos momentos más dificils y an que os bytes pareixen estar ya os zaguers aliaus ta dar una salida digna a lo muito que encara o periodismo pueder fer o a sociedat.

Ya pasada a fase de “Internet ye o futuro”, que encara bell ponent deciba no fa guaire, aluenyau d’un presente que se n’ha minchau l’industrial, a esfensa d’os modos periodisticos por dencima d’o formato, ha estau a nota mandant en iste congreso. Y encara, que, como ye de dar, ha estau dificil meter d’alcuerdo a os profesionals que esplanicaban as suyas impresions arredol de si o periodista ha de continar estando una sinyatura u bien esdevenir en una marca presonal, ningún no ha dubtau d’o que ye iste oficio: un vehiclo de transmisión que fa forma a o dreito d’a ciudadanía a estar informada.

“A etica ye siempre l’alazet d’o periodismo. Y etica quiere dicir contrastar as fuents, significa veracidat”, remeraba a presidenta d’a FAPE, Elsa González, en a devantadera d’o congreso, qui bi adhibiba que “no hemos de trafucar o nuestro oficio, a información, con un rete social”. No estió a unica que trucó o ficacio en que periodismo dichital ye, a la fin, periodismo. “No somos disenyadors, somos informadors”, lis deciba Alberto Artero, director  de Elconfidencial.com, a os muitos estudiants que ascuitaban dende as butacas.

Trazas de fer, ganas, vocación, profesionalidat y proactivismo estioron atras d’as parolas que se’n repetioron entre qui, ya consolidaus en l’arte u desgracia de esplanicar historias, feban un poder por reivindicar “l’oficio más bonito d’o mundo”, en parolas d’o cronista colombiano Alberto Salcedo.

Asinas, se animoron a deixar dezaga as medranas y achugar por a visibilidat en o rete. “Si he de trigar dentre dos periodistas en igualdat de condicions, me quedo con qui tienga presencia en os retes socials”, deciba Sindo Lafuente. L’atra baza, l’emprendimiento. Os creyadors de nueu prochectos que acaban de plegar en o mundo dichital, como Ignacio Escolar, de Eldiario.es u Eduardo Galán, d’a revista Mongolia, estioron os encargaus de crebar una lanza a  favor de l’autoemplego en tiempos d’ature.

Twitter y a suya omnipresencia han teniu un puesto preferent. O fascinant d’o rete d’os 140 caracters, reinante mientres tot o congreso, han estau obcheto de debate. Por destacar bellas ideyas: un tuit ye una fuent, pero nunca no sin contrastar; Twitter ye información, pero tamién entretenimiento, diversión, debate, ligoteo; condensar una ideya en 140 letras no puede estar a fin, que ha d’estar un meyo; a obsesión por a inmediatez no ha d’estar por dencima d’o periodismo.

O congresó remató con a presencia de Iñaki Gabilondo. Con o Palacio de Congresos a rebutir de chent, o veterano periodista fació un canto a la honestidat y l’optimismo. “O que ye en crisi no ye o periodismo, sino lo negocia que tien dezaga”, afirmó. Y querió animar a os cients de chovens que l’ascuitaban, mans en teclau, reclamando rasmia ta continar entabant: “no enduro a qui ditz que os chovens de hue no tienen futuro. Si yo estase choven, no deixaría a dengún dicir-me-lo en a cara”.

Remataban asinas 48 horas d’analís periodistico d’Aragón enta o mundo. Ixo sí, con poquetas, bueno, ni garra ni mica, referencias a fenomenos naixius dende o país y que estioron sinyaleros ta l’achenda mediatica mundial, como l’Ecce Homo de Borcha, que ni programadors ni ponents tenioron en consideración t’analista encara que achuntaba a esencia d’o dichital y d’o periodistico. Por debant, a lo menos un anyo más de Congreso. As autoridatz presents facioron o compromiso de continar achugando por un congreso que ya fa parti de l’achenda anyal aragonesa.

Os premios

O periodista de Pontevedra Manuel Jabois se fació con o premio José Manuel Porquet por a suya frescura y capacidat d’analís.

José Antonio Pérez, autor d’o blog Mi mesa cojea, recibió o guardón Blasillo de Huesca. O churau tenió en cuenta l’inchenio y o somardeo d’o bilbaíno ta tractar con sentiu de l’humor os temas más espinosos de l’actualidat.

Por primer vegada o Congreso premió a os suyos participants por l’inchenio y o tractamiento d’o Congreso en twitter. O dibuixant de @telomeneses recibió o reconoiximiento por as suyas ilustracions mientres as ponencias, y a tuitera @llamamebrava estió reconoixida como a millor cobertura d’os actos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.