O PIR tornará a amostrar a cultura y mosica pirinencas en Aragüés

Coriandre y Trikiteen meterán a mosica d'o concierto d'a nueit d'o sabado

Actuación en o PIR de 2013

Actuación en o PIR de 2013

O Festival de Mosica y Cultura Pirinencas PIR torna estianyo t’Aragüés d’o Puerto (Chacetania), en a suya XVIII edición, a on que mosicos de totz os territorios pirinencos amostrarán as suyas mosicas y a suya anvista d’o mundo. O festival, seguntes recuerda a organización, “naixió ta potenciar a cultura pirinenca, en considerar que os Pirineus tienen una unidat cultural propia que fa que a cultura se interprete como qualcosa que va dillá d’un simple localismo”.

O premio “Truco”, que entrega la organización totz os anyos, s’ha dau en ista edición a o “Centro Artesà Tradicionàrius” por a suya faina en favor d’a cultura pirinenca. O premio ye una esquila feita en o taller artesanal de Nay (Bearn).

O programa d’actos prencipiará con una pasavilla d’a Ronda de participants en a III Trobada de Chiflo y Salterio de Lasaosa. Pasavillas, gaiters, bailes, etc… plenan un programa d’o sabado rebutient de mosicos y borina. O concierto de nueitz, l’acto más multitudinario, tendrá como protagonistas a las collas Coriandre y Trikiteen.

O domingo se presentará o prochecto “El camino del pastor” y s’entregará o premio Truco en una actuación de palotiaus y gaiters. Como ye quasi tradición, a zaguer actuación será la de La Ronda de Boltaña, qui dende as 19:00 despedirán o PIR dica l’anyada venient. O programa completo se puede consultar en a web d’a comarca d’a Chacetania.

Ta dormir-ie, se puede trigar qualsiquier d’as casas rurals u hotels que bi ha en a redolada. Antimás s’ha habilitau as zona verde d’as piscinas d’o lugar a on que se puede acampar.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.