O Pleno d’o Concello de Zaragoza refusa declarar a ciudat como zona d’uso historico de l’aragonés

Con 14 votos en contra (PP y Ciudadanos), 11 a favor (Zaragoza en Común y CHA) y 6 abstencions (PSOE) se refusó ista moción

Foto d'archivo d'un Pleno. Foto: Concello de Zaragoza

Foto d’archivo d’un Pleno. Foto: Concello de Zaragoza

O Pleno d’o Concello de Zaragoza refusó o pasau viernes una moción de Zaragoza en Común en que se pediba a o Gubierno aragonés a declaración d’a ciudat como zona d’uso historico predominant de l’aragonés. PP y Ciudadanos votoron en contra, Zaragoza en Común y CHA a favor, mientres que o PSOE s’abstenió.

O consellero de Cultura y Economía, Fernando Rivarés, de Zaragoza en Común, defendió a moción en parte en aragonés, en parte en castellano, reivindicando a existencia d’a milenaria luenga en a capital aragonesa dende siempre, aportando o dato d’a existencia de mas de 7.000 fablants. Asinas mesmo, alvirtió que a UNESCO reclama protección pa l’aragonés, una d’as luengas europeas en mas grieu periglo de desaparición.

Dende CHA, Carmelo Asensio defendió a suya postura integrament en aragonés y agradeixió que unatra formación politica que no fuese CHA presentase ista moción. Asensio recordó a importancia en a historia d’Aragón d’a luenga aragonesa y sinyaló que “a esfensa d’una luenga debe estar de totz y todas“, anyadendo que “estar un país trilingüe ye un luxo, ye una riqueza cultural y un privilechio“.

A intervención d’o PP, d’a man d’Ángel Lorén, pretendió fer-se a mofla d’a moción, sinyalando que l’aragonés tien20 variants lingüisticas” y que costaría a-saber-los diners normativizar-la pa “mantener una serie de privilechios”. Destacó que o rastro historico d’a luenga “s’ha perdiu en a ciudat“. Lorén insitió que o PP defiende una ciudat de “mas Obamas y menos ayatolás” y con l’anglés como luenga vehicular y noa fabla“.

Cristina García, de Ciudadanos, tamién se posicionó contraria a la moción, argumentando que en Zaragoza a luenga mayoritaria ye o castellano, encara que almitió as cifras de fablants d’aragonés en a capital y expresó o suyo “respecto”. Asinas mesmo, tamién facío servir l’argumento d’un “elevau coste economico” pa refusar ista moción.

Dende o PSOE, Lola Ranera defendió l’abstención d’o suyo grupo escudando-se en que “o Estatuto d’Autonomía brinda reconoiximiento a las luengas propias” y que ye competencia d’o Gubierno aragonés y d’as Cortes d’Aragón. Consideró a moción “desproporcionada”, encara que tamién expresó o suyo “respecto” a os aragonesofablants.

Fernando Rivarés, en un nuevo turno de palabra, respondió a las moflas d’o representant d’o PP: “no charro fabla, charro aragonés. A l’aragonés le cal normativización, sí, pero tamién respecto, una manca en iste pleno“.

Antes d’o debat d’a moción, Jorge Pueyo, representant de Chobentú Aragonesista, dende o publico, pidió, como fablant nativo d’aragonés, “empatía pa os charradors y charradoras“, sinyalando que “defendendo l’aragonés, defendemos o patrimonio d’Aragón“.

Tanimientres, mas localidatz aragonesas se declaran zonas d’uso predominant historico d’a luenga aragonesa. Candarenas y Fonz s’han uniu a una lista que componen Sant Chuan de Plan, L’Ainsa, Boltanya, Broto, Arguis, Ayerbe, Biscarrués, Santa Cilia, Almudevar, Uesca, Torralba d’Aragón y as comarcas d’a Plana de Uesca, Alto Galligo y Sobrarbe.

2 Rispuestas a O Pleno d’o Concello de Zaragoza refusa declarar a ciudat como zona d’uso historico de l’aragonés

  1. Pingback: El Pleno del Ayuntamiento de Zaragoza rechaza declarar la ciudad como zona de uso historico del aragonés [arg]

  2. Zaragoza punta de lanza d’o espanyolismo en Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.