O polemico cartel de fiestas d’Alcanyiz declarau nulo por o suyo concello

O concurso d'o cartel de fiestas lo heba ganau una Plataforma en Esfensa d'os Servicios Publicos

O cartel ganador

O cartel ganador

O cartel d’as venients fiestas d’Alcanyiz (Baixo Aragón) será disenyau por un artista local y no será o que ganó lo concurso convocau o pasau mes de chunio. O concello lo ha decidiu asinas, dimpués d’a polemica creyada en ganar o debantdito concurso un cartel feito por a Plataforma en Esfensa d’os Servicios Publicos d’o Baixo Aragón Historico, a on que se viyeba un lazo negro arredol d’una foto de l’hespital d’Alcanyiz.

O concello ha basau a suya decisión en irregularidatz tecnicas en l’aprebación d’as bases de lo concurso, a tamás de que yera las mesmas bases que l’anyada pasada, quan s’esleixió atro cartel sin garra problema. O concello ya ye treballando en unas nuevas bases ta l’anyada venient que “deixen a un costau as diferencias politicas”.

O cartel, que ganó amplament o concurso, ubrió un debat en toda la redolada y prou que consiguió parti d’o que yera o suyo obchectivo seguntes os disenyadors: ubrir o debat ta que os ciudadans opinasen sobre lo prochecto de construcción d’o nuevo centro hespitalario con colaboración publico-privada. En un primer inte a Plataforma dició estar “dispuesta a sacar o cartel” d’o concurso pero debant de “l’actitut antidemocratica d’o equipo de gubierno decidioron de continar entabant.

As fiestas d’Alcanyiz, que se ferán entre o 8 y o 13 de setiembre, contarán con un nuevo cartel, disenyau por un artista que trigará lo concello, y sin pasar por votacions populars.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.