O PP apreba de forma definitiva a LOMCE en o Congreso en solitario

A nueva lei d'educación ha estau aprebada con 182 votos d'o PP, l'abstención d'UPN y os 143 votos en contra d'a resta de grupos

José Ignacio Wert en foto d'archivo. Foto: Gubierno d'Espanya (www.lamoncloa.gob.es)

José Ignacio Wert en foto d’archivo. Foto: Gubierno d’Espanya (www.lamoncloa.gob.es)

Estió un debat previsible, en que o PP y a resta de grupos tornoron a defender con argumentos repetius posicions irreconciliables. A LOMCE naixe no ya sin consenso, sino evidenciando a solitut con que o Gubierno concara a reforma con mas peso ideolochico d’os suyos dos anyos de chestión, y con a que materializa parte d’un programa electoral que en o equador d’a lechislatura s’acusa a Mariano Rajoy d’haber ixublidau. A nueva Lei Organica d’Educación estió aprebada con a mayoría parlamentaria d’o PP, l’abstención d’UPN (a ‘marca’ popular en Nabarra) y con os votos en contra de toda a resta de grupos d’a oposición, que han reiterau o suyo compromís de derogar-la malas que o PP pierda a suya mayoría absoluta.

José Ignacio Wert ha aconseguiu o suyo prencipal obchectivo pero a un alto coste. O d’estar o ministro pior valorau d’o Gubierno, a tal punto que en o mesmo día en que a suya lei sale entabant sin refirme, practicament totz os partius menos o suyo reprueban oficialment a suya chestión. De feito, Wert estió solament en a suya cadiera, sin a companyía de garra ministro d’o Gubierno.

Dimpués d’o debat, Wert agradeixió a totz os grupos o treballo y as alportacions “que enriqueixen y amilloran o texto” entre uelladas d’asombro y cenyos d’incredulidat. En o suyo tramite parlamentario se presentoron 19 esmiendas a la totalidat y mas de 1.500 esmiendas parcials, d’as qualas, en parolas d’o diputau socialista Jaime Bedera “solament s’admitió un numero testimonial”, y a mayor parte d’ellas a propuesta d’o PP.

Bedera auguró problemas d’aplicación pa la recientment naixida lei. Y enumeró bella d’as dubdas que se ciernen sobre ella. O d’a financiación (“no tien os creditos pa desarrollar-la y as comunidatz no’n tienen de diners“, aseguró), o tecnico (“amenista mas de 20 reyals decretos, mas os d’as comunidatz, mas a elaboración d’os libros, mas as complicacions administrativas…“) pa acabar en o politico: o compromís de derogación. “Consello a que no malfurrien tiempos ni recursos pa una lei que ye muerta antes de plegar en o BOE”, concluyó Bedera. A la oposición politica se suma l’autonomica. Qualques CCAA han anunciau ya a suya intención de levar a lei debant d’o Tribunal Constitucional porque entienden que vulnera as suyas competencias.

Wert recibió criticas dica en verso

Con un nulo refirme parlamentario, o PP ha recurriu una vegada mas a o d’as urnias. A popular María Jesús Moro apeló a os quasi 11 millons de votants que atorgan lechitimidat a l’acción d’o Gubierno. Y chustificó a falta d’alcuerdo con l’argumento que “pa aconseguir consenso belún ha de ceder un poquet” y “no pa tornar a o punto de partida u l’immovilismo”. O PP sostenió que a LOMCE “respecta en forma relevant a LOBE (a lei vichent) y criticó o cinismo d’o PSOE en charrar d’a privatización d’a educación quan estió o gubierno socialista o que “inventó y alimentó” os conciertos. “Hue descubren que no les fa goyo?”, ironizó.

Wert, fidel a o suyo estilo provocador, no podió renunciar a chenerar polemica con as suyas parolas. Dimpués de bellas criticas a la influencia d’a Conferencia Episcopal en o texto y a creixent importancia que da a LOMCE a l’asignatura de Relichión, o ministro soltó: “Aspero que no se malinterprete que faiga aquí una cita biblica. I hai un tiempo de destruir y un de construir. Aspero que hue haiga acabau aquí o tiempo de destruir y nos concentremos totz en construir”.

A resta d’o debat estió una colección de duras parolas ent’o ministro Wert, a suya chestión y a suya lei, sin nian expresions amables por parte d’UPyD y UPN, que s’heban amostrau mas cercanos a la posición d’o Gubierno. Carlos Martínez Gorriarán (UPyD) arribó a describir a LOMCE como “LOBE mas catequismo”. Coalición Canaria (agora en o Grupo Mixto), que emparó a LOCE de José María Aznar, destacó as “extranias unanimidatz” suscitadas por a lei.

Maite Ariztegui, d’Amaiur (Grupo Mixto) acusó a Wert d’estar “de raso isolau, dimpués d’o muro que le desepara d’a comunidat educativa. Soi convencida que l’inusitau consenso politico y social d’o refuse a ista lei provocará estudios sociolochicos”. A diputada protagonizó talment l’unico momento curioso d’o debat. “Le’n hemos dito de mil trazas y aprofitando os segundos que me quedan le’n voi a decir en verso”, anunció. Y se metió a cantar dende a tribuna entonando una melodía popular vasca. A vicepresidenta d’o Congreso, Celia Villalobos, le pidió entre risas que traducise aquella canta. Pero calió asperar a os corredors pa lo ‘doblache’: “Somos construindo a nuestra poca educación en Euskal Herria. No permitiremos que a LOMCE entre en as nuestras aulas”.

O País Vasco ye un d’os puestos a on i hai habiu u s’han convocau concentracions en protesta por l’aprebación d’a lei. A Plataforma por a Escuela Publica (que reune a asociacions de pais y sindicatos d’estudiants y profesors) ha organizau pa lo sabado una gran manifestacion en o centro de Madrit, pa la que mesmo han fletau autobuses dende distintas ciudatz espanyolas.

Isabel Sánchez Robles (EAJ-PNV) recordó a Wert a suya promesa que renunciaría a o suyo cargo si s’apreciaba inconstitucionalidat en a LOMCE. “Vaiga redactando a suya carta de dimisión y no aspere a o Constitucional”, recomendó. As demandas de dimisión se multiplicoron quasi por o numero d’intervencions, con enunciaus tant duros como “no nos avergüenye mas” de Jaime Bedera.

Igualdat y Educación s’alcuerdan d’a violencia de chenero

En bell medio d’o conoixiu escacilo d’o Pleno, por os corredors d’o Congreso circulaba a información que os ministerios de Sanidat, Servicios Socials y Igualdat y o d’Educación son estudiando a traza d’incluir os contenius sobre igualdat y prevención d’a violencia de chenero que os ninos estudiaban en l’asignatura Educación pa la Ciudadanía, que desapareixe dimpués de l’aprebación d’a LOMCE. Entre as opcions que barallan ye a d’incluir-los en l’asignatura alternativa a Relichión, a de Valors Civicas, que por agora ye vueda de conteniu. Tamién s’estudea impartir os contenius d’igualdat de forma transversal, incorporando en determinadas asignaturas o enfoque de chenero.

O Congreso pidió a o Gubierno o pasau martes, por unanimidat, un plan integral pa abordar a violencia masclista en a choventut, en colaboración con as comunidatz autonomas y a Federación Espanyola de Municipios y Provincias, que incida en a formación en igualdat de chenero dende as aulas. O texto alcordau reclama incorporar programas de formación especifica a o profesorau d’os colechios pa detectar os posibles casos de violencia masclista y incluir a perspectiva de chenero en as diferents arias educativas.

Agora que, istos cambeos habrán d’incorporar-se en o desarrollo reglamentario d’a lei posterior a la suya aprebación, porque en o periodo de presentación d’esmiendas o tema no s’incorporó a o texto. Asinas que, por agora, a lei naixe sin os contenius que incluiba a denostada Educación pa la Ciudadanía y que agora Educación y Igualdat troban fundamental.

Fuent: http://www.eldiario.es/sociedad/LOMCE-Wert-educacion-Congreso_0_201580024.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.