O PP balear refusa as esmiendas en favor d’o catalán en a función publica

O PP refusa todas as esmiendas a la totalidat d'o Prochecto de Lei de modificación d'a Lei d'a Función Publica balear, que baixa de categoría a la luenga catalana.

Foto: Parlament de les Illes Balears

O PP balear ha refusau, en virtut d’a suya mayoría absoluta, as esmiendas a la totalidat presentadas por a oposición (PSM-IV-Entesa y Més per Menorca y PSIB-PSOE) en o Prochecto de Lei d’a modificación d’a Lei d’a Función Publica que degrada o catalán de requisito ta acceder-ie, a simple merito. Ista modificación feita por o Gubierno balear de José Ramón Bauzá tien a oposición d’a resta de partius en o Parlamento balear, asinas como gran parti d’a sociedat y mesmo de bells miembros d’o PP. O diputau d’o PP, Antoni Pastor, ha votau a favor d’as esmiendas, votando contra o suyo partiu.

A oposición ha criticau ista modificación y s’ha fablau de “chenocidio contra a luenga” como ha comentau Francina Armengol, dirichent d’o PSIB-PSOE, que amás ha anunciau que si ganan as venients eleccions, tornarán ta zaga ista modificación. O diputau de PSM-IV-Entesa y Més per Menorca, Nel Martí, considera que a modificación “ataca a oficialidat y territorialidat d’a luenga catalana”.

A sociedat balear s’ha movilizau por a luenga catalana dende totz os ambitos (cultural, educativo, politico, social, comunicativo, vecinal, …). En as zagueras semanas, por a on pasaba o president Bauzá, se i trobaba con multitut de protestas contra as retalladas socials y a suya politica lingüistica, estando recibiu con chiflos y chilos en os lugars.

A lei continará o suyo curso en o Parlamento balear. A modificación d’ista lei metería en periglo o consenso consiguiu en 1986 en a Lei de Normalización Lingüistica.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.