O PP imposa o espanyol en as ondas valencianas, nomás en tres anyos

O zarre de TV3, RTVV y Catalunya Ràdio deixa o País Valenciano sin garra emisora de radio ni televisión en catalán, fueras de qualques comarcals

Catalunya_radioAhiere a las ueito d’a nueit Acción Cultural d’o País Valenciano desconectaba as antenas que dende feba amán de trenta anyos ninviaban a os dials valencianos o sinyal de Catalunya Ràdio. Lo feba a retepelo. Horas antes o gubierno espanyol heba feito plegar en a entidat un expedient con sendas pinyoras de medio millón por as emisions y tamién -isto por primer vegada- por o feito de tener os repetidors dende an que s’espardiban as ondas. O zarre respondeba a la denuncia d’una colleta d’extrema dreita que heba advertiu a la Generalitat Valenciana d’as emisions de Catalunya Ràdio. Una denuncia ridicla, porque yera una emisión publica, conoixida y reconoixida por a Generalitat Valenciana.

Con este zarre, o dial valenciano de radio y televisión queda de tot popiello d’emisoras en a luenga propia. En tant solament tres anyos, as accions chudicials interpresas por os gubiernos valencianos han forzau a trancar todas as emisoras que alcanzaban o conchunto d’o País Valenciano. Nomás qualques televisions y radios locals y comarcals resisten encara. Tanto as cadenas que penden d’o gubierno valenciano como as que penden d’o gubierno de Catalunya han estau clausuradas.

Tv3 primer

A primera parte d’a ofensiva estió contra Tv3 y as atras emisoras de televisión d’a Corporación Catalana de Medios Audiovisuals. Capitaneyada por a Generalitat Valenciana, que aduciba que as emisions yeran ilegals tot y que se podeban veyer con normalidat en tot o País Valenciano dende 1985. Cal destacar que a Generalitat Valenciana no ha acazau nunca garra d’as dotzenas d’emisoras ilegals que emiten en castellano y se veyen tamién en o País Valenciano.

Dimpués d’un largo “tira y afloja” chudicial, finalment Acción Cultural d’o País Valenciano se trobó forzada a amortar os repetidors. Estió o 17 de febrero de 2011, en veyendo que as pinyoras que le imposaba reiteradament a Generalitat Valenciana podeban liquidar a entidat. A reacción indignada d’a sociedat valenciana se fació vistera con a etiqueta de Twitter #sensesenyal, en tot de declaracions y presas de posición de partius, asociacions, institucions y concellos y con una colla de manifestacions en as carreras d’as prencipals ciudatz.

Tamién con una iniciativa lechislativa popular, ‘Televisió sense fronteres‘, que reunió finalment 650.650 sinyaturas debidament acreditadas. A ILP se presentó en o congreso espanyol y estió refusada, sin negociar res, por a mayoría absoluta d’o PP.

O gubierno de Catalunya, ya en a epoca d’o tripartito, heba proposau unatra posible solución: una negociación entre todas dos Cheneralidatz ta emitir reciprocament as televisions a totz dos costaus. A negociación no plegó nunca en buen puerto, tot y que entre una temporada se veyó Canal 9 tamién en o Principau. O gubierno valenciano metió tot de sincusas ta atrasar a sinyatura d’o convenio y finalment o zarre de RTVV significó tamién o zarre de qualsiquier posibilidat de seguir ista vía.

A sorpresa d’o zarre de RTVV

Qui se pensaba que o problema yera que Tv3 y Catalunya Ràdio yeran emisoras ‘catalanas’, se dispertoron de rapiconté o 29 de noviembre pasau. En una decisión extremadament contestada, o gubierno valenciano ordinó de zarrar as emisoras de RTVV, Canal 9 y as atras canals de televisión y de radio.

L’impacto sobre a sociedat valenciana estió, en iste caso, enorme. Primer de tot, porque o gubierno valenciano heba actuau con una incomprensible improvisación y, de resultas d’isto, as emisoras heban emitiu amán d’un mes sin o control politico que tanto las heba afogau. Y, dimpués, porque a nueit final resultó patetica, con a policía invadindo as instalacions de Burjassot.

De feito, a reacción politica por este zarre encara dura, y o president Fabra ye chilau vaiga a on vaiga. Antiparte, totz os partius politicos d’a oposición s’han comprometiu a tornar a ubrir a emisora quan gubiernen y a buscar a reciprocidat con as emisions d’a Corporación Catalana de Medios Audiovisuals.

Y finalment Catalunya Ràdio

Con tot y con ixo, encara con as protestas muit vivas en a carrera por o zarre de RTVV, o gubierno espanyol, a instancias d’una desconoixida asociación d’extrema dreita, obligó a ACPV a trancar os repetidors. Y ahiere, a las ueito d’a nueit, as antenas estioron desconectadas.

O zarre va acompanyau de pinyoras por valor de medio millón d’euros cadaguna, por as emisions y por a construcción y posesión d’os repetidors dende os quals s’emitiba o sinyal. Istos repetidors, financiaus por suscripción popular en os uitanta, son propiedat d’Acción Cultural d’o País Valenciano y, en qualques casos, de concellos de colors politicas diversas.

Qué situación queda agora?

Dimpués d’iste nuevo truco, en o País Valenciano emiten dos canals de televisión que cubren o conchunto d’o territorio, Mediterranio y Ehs, todas dos en castellano.

Entre as televisions locals, a graniza mayoría emite en castellano, si bien i hai fuerza ta que tengan programas en catalán. Se’n destaca Levante TV en a ciudat de Valencia, a TV Comarcal en Exativa, a televisión d’Alcoi, Nord y TeleCastelló u Información, que emite qualques programas en catalán en Alicant.

Fuent: http://www.vilaweb.cat/noticia/4168437/20140122/pp-imposa-lespanyol-ones-valencianes-nomes-anys.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.