O PP pretende de fer os escraches mas graus delito de terrorismo

Influir en l'actuación d'una autoridat, alterar a paz social y o funcionamiento d'as estructuras politicas será considerau terrorismo si o PP fa valer as suyas propuestas

Escrache en Cella (Foto: El ventano)

Escrache en Cella (Foto: El ventano)

O PP pretende de fer o delito de terrorismo en un conchunto en que i culle quasi tot. As suyas esmiendas presentadas en a reforma d’o Codigo Penal incluyen un listau de nuevas practicas homologables con a definición que tradicionalment se reservaba pa bandas como ETA u os GRAPO. A nueva catalogación que quiere imposar o PP sinyala a os escraches, as vagas con piquetz u l’alteración d’un pleno parlamentario en a muga d’estar definius dreitament como terrorismo. O fa de traza ambigua, imprecisa y excesivament ampla.

En a esmienda 874 redactada por o PP se puede leyer: “Se considera terrorismo a comisión de qualsiquier delito grau” que pretenda “alterar graument u de qualsiquier atra traza a paz social“. O tradicional sentiu que se le ha dau en democracia a o termin “paz social” –l’alcuerdo entre Gubierno, sindicatos y patronal– prencipió a cambiar o día que Jorge Fernández Díaz prenió posesión d’o suyo cargo de ministro d’Interior en chinero de 2012. A suya primer intervención como ministro estió adedicada quasi en o suyo 50 por cient a explanicar l’obchectivo de mantener a “paz social” en un momento de mas que previsibles protestas socials. L’atra metat d’a suya intervención la ocupó quasi por completo a o terrorismo d’ETA.

En atro punto d’a propuesta, o PP diz que será terrorismo qualsiquier delito que acace “influir u condicionar de traza ilicita l’actuación de qualsiquier autoridat nacional u extranchera“. En l’articulau proposau no i hai referencia expresa a os escraches pero, seguntes fuents churidicas, d’aprebar-se o nuevo Codigo Penal en os termins que pretende o PP, “pareixe evident que se ye ubrindo a puerta a considerar-los como un delito de terrorismo, quan en o suyo desenrollo se produzca bell delito grau”.

Juan Antonio Lascuraín, catedratico de Dreito Penal d’a Universidat Autonoma de Madrit, considera que “determinaus escraches excesivament agresivos los serían fendo en delitos de terrorismo en función d’a reforma legal planteyada“. Seguntes iste profesor, as esmiendas d’o PP “fan servir termins extraordinariament abstractos y dimpués ixos termins los carga o diaple”.

A esmienda 874 afirma que qualsiquier delito que acace “alterar graument o funcionamiento d’as estructuras basicas politicas” tamién será considerau terrorismo. Ista referencia recorda a l’asedio a o Parlamento de Catalunya en 2011 u as convocatorias de Rodea o Congreso d’o 25 de setiembre de 2012. Con o Codigo Penal vichent, o caso catalán fue chudgau y  s’estimó d’absolver a os acusaus d’os delitos d’atentau contra as institucions d’o Estau. Si as tesis d’o PP s’imposan, un caso similar suposaría con gran probabilidat a obridura d’un proceso por terrorismo.

A deriva que ha imposau o Partiu Popular en as suyas leis d’orden publico choca con a doctrina d’o Tribunal Constitucional que alvierte d’o “efecto d’o desaliento“. Seguntes ista doctrina, tamién asumida por o Tribunal Europeu de Dreitos Humanos, o risgo de sancionar en exceso os delitos cometius en exercicio de dreitos fundamentals puede acabar provocando o desaliento d’a ciudadanía en o exercicio normal d’ixos dreitos. Dito d’atra traza, si os delitos cometius entre una manifestación u en o exercicio d’o dreito d’expresión son penaus en exceso, a ciudadanía acabará renunciando a manifestar-se u a expresar-se librement por temor a sancions.

As propuestas d’o PP han estau apartadas d’o debat sobre o Codigo Penal tot aguardando a negociación que s’ha ubierto entre os dos prencipals partius. Fuentes d’o PSOE consultadas por eldiario.es advierten que no son disposaus a acceptar o “camín de criminalización” y “cheneralización d’o terrorismo” que pretenden os de Rajoy. Caso que as negociacions no pleguen en buen puerto y o PP insista en as suyas propuestas, o grupo mayoritario se veyerá obligau a aprebar istos cambeos en solitario. Sería a primer vegada en democracia que un partiu en o Gubierno aprebe a suya politica contra o terrorismo sin o concurso d’o prencipal partiu d’a oposición.

Fuent: http://www.eldiario.es/politica/PP-pretende-convertir-alteracion-terrorismo_0_345766354.html

Una rispuesta a O PP pretende de fer os escraches mas graus delito de terrorismo

  1. Pingback: O PP pretende de fer os escraches mas graus delito de terrorismo | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.