O PP rebla y o congreso espanyol admite a tramite a ILP sobre a dación en pagas

Una concentración contra os desafucios en Zaragoza arrocla a bells cientos de personas debant d'a siede d'o PP

Concentración debant d'a siede d'o PP en Zaragoza

Concentración debant d’a siede d’o PP en Zaragoza

Yera dificil de preveyer, pero a la fin, a ILP (Iniciativa Lechislativa Popular) sobre a dación en pagas presentada por a Plataforma d’Afectaus por a Hipoteca (PAH) se ha admitiu a tramite. Lo ha feito posible os votos a favor d’o Partiu Popular qui, a la fin, ha reblau debant d’a presión popular que bi ha habiu istos diyas y d’o más de 1.4000.000 firmas que refirmaban a ILP.

L’ambient s’heba calentau d’antis con as declaracions de Ada Colau en a comisión d’Economía a on que calificó a lei hipotecaria y a o representant d’os banquers como “criminals”. Os diputaus mientres istos diyas han recibiu antimás más d’un millón de correus electronicos demandando-les que votasen a favor d’a ILP y por muitas ciudatz de l’Estau s’han viviu movilizacions de toda mena. En istos dos zaguers diyas, tres personas s’han suicidau tamién por a suya situación de desafucio.

Coladas as seis d’a tardi, o PP feba oficial o suyo cambio de voto de bote y boleyo. Mientres os diyas d’antis y mientres toda la chornada heba continau con a decisión de no prener en consideración a ILP.  En a suya intervención, o PP ha dito “entender que os colectivos antidesafucios estasen carranayaus debant d’a inacción mientres o gubierno d’o PSOE”. Ixe partiu, de boca de Leire Iglesias, portavoz de Vivienda ha reconoixiu as errors mientres o suyo gubierno y diz “compartir a necesidat d’una moratoria y refirmar a dación en pagas con loguero social”. A Cucha Plural (a on que son IU, ICV y CHA) deciba se felicitaba por “disposar d’una nueva oportunidat ta platiquiar sobre solucions verdaderas y no nomás parches u placebos“. Dende a resta de partius de cuchas, se ha refirmau con diferents intervencions a ILP y s’han remerau belunas d’as iniciativas en a mesma endrecera que istas collas han presentau mientres as zaguers anyadas.

En rematar a a intervención de Teodoro García, a on que reafirmaba o sí d’o PP a la tramitación d’a ILP, os miembros d’a PAH presents en l’hemiciclo han pretau a chilar “Sí se puet”, unindo as suyas voces a las d’a chent que lo chilaba a las puertas d’o congreso. Os representants d’o colectivo antidesafucios son estaus forachitaus d’a sala, debant d’un niervudo Jesús Posada, president d’o Congreso. Un d’ells ye estau deteniu por “faltar a los diputaus”.

Iste trango no significa que a lei s’aprebe sino nomás que se tramitará. Por ixo, os colectivos y partius que la han refirmau son muito cudiadosos y saben que ye muito posible que o PP no retacule en qüestions como la dación en pagas retroactiva, u que mesmo a lei se vulque u s’esbafe en atro d’os trangos que ha de fer antis d’aprebar-se.

Concentración en Zaragoza

En Zaragoza, bells cientos de personas se concentraban debant d’a siede d’o PP a partir d’as siet d’a tardi. Un fuerte control policial de cinco furgonetas y bellas decenas de policías los cusiraban y feban un rolde arredol d’os manifestants. Mientres a concentración s’ha feito un minuto de silencio en remerando as tres zaguers victimas d’os desafucios y s’han chilau frases contra o PP u os banquers y a favor d’as midas en contra d’os desafucios.

Dimpués de bells tres quartos d’hora y un rechistro de man d’a policía a la mochila d’un d’os manifestants, a concentración s’ha declarau rematada y a chent que bi yera se’n han iu de conchunta baixando por o Paseu Independencia con a policía en tot inte acompanyando-los a os dos costaus.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.