O PP solicitará a o Gubierno de Zaragoza un informe contable mensual

Os populars aseguran que a documentación elaborada por o Servicio de Contabilidat pasaba a la resta de grupos con dita periodicidat, un feito que cambió dimpués de l'aprebación d'o presupuesto 2012

As criticas d’UPyD en Zaragoza enta Juan Alberto Belloch, alcalde d’a ciudat, por una supuesta falta de transparencia en qualques puntos d’a suya chestión ya no son solas. O PP ha comunicau que demandará en a Comisión de Presidencia, Economía y Ficienda un mayor cumplimiento d’a Ordenanza de Transparencia y solicitará a l’equipo de gubierno que facilite toda a información contable d’a capital aragonesa de forma mensual.

María Jesus Martínez, concellera d’o PP, ha asegurau que a documentación que elabora o Servicio de Contabilidat ye “alazetal” y que s’entregaba cada mes “como una tradición democratica d’a institución”. Asinas mesmo, ha recordau que, dimpués de l’aprebación d’o Presupuesto 2012, l’equipo de gubierno municipal ha reduciu a entrega a una vegada cada tres meses. “Charran de transparencia, pero no les intresa o control d’as cuentas publicas por parte de l’unico partiu que exerce a oposición”, ha explicau Martínez, que no s’explica como podió reducir o periodo y que agora o propio Belloch planteye a opción de penchar toda a información contable en a pachina web d’a ciudat.

Por ixo, a edil d’o PP demandará a o responsable de l’aria, Fernando Gimeno, que “rectifique, cumpla con o suyo propio borrador y entregue os documentos contables correspondients a os meses d’agosto y setiembre. Sería a demostración que, verdaderament, i hai voluntat de transparencia con os grupos y con o conchunto d’a ciudadanía”.

Amás, solicitarán en a Comisión de hue una serie d’explicacions por supuestas irregularidatz en o cumplimiento d’a Lei de Morosidat, que obliga a o Gubierno de Zaragoza a tresladar trimestralment a o pleno un documento con as facturas d’as que no s’haiga tramitau a suya reconoixencia d’obligación. “Han pasau mas de dos anyos dende l’aprebación d’ista Lei y o Concello de Zaragoza sigue resistindo-se a cumplir-la”, ha concluyiu a concellera popular.

Fuent: http://www.aragon2.com/n-20237-503-PP_solicitara_Gobierno_Zaragoza_informe_contable_mensual

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.