O president d’Echipto aparta a l’exercito d’o poder

Inesperau cenyo de Mursi, que ha restaurau os poders presidencials, restrinchius por os militars

O president d’Echipto, Mohammad Mursi, cesó ahiere a la cupula de l’exercito y restauró os poders presidencials restrinchius por a esmienda constitucional que os militars sancionoron o 17 de chunio pasau.

O 17 de chunio estió, chustament, o zaguer día d’as eleccions que facioron de Mursi o primer president civil d’a historia echipcia trigau democraticament.

Mursi decretó ahiere que a cabeza d’o Consello Supremo d’as Fuerzas Armadas (CSFA) y ministro d’Esfensa, Mohammad Husein Tantawi, y a cabeza d’Estau Mayor de l’Exercito, Sami Enan, deixasen o cargo y se chubilasen. Totz dos han estau nombraus asesors presidencials y distinguius con a Medalla d’o Nilo, a condecoración militar de mas rango d’o país.

Mursi prenió ista decisión dimpués de conversar con Tantawi y con os prencipals oficials d’o CSFA, manifestó o cheneral Mohammad al-Assar, integrant d’o consello.

O nuevo ministro d’Esfensa designau por Mursi ye Abdelatif Sisi, y a nueva cabeza d’o Estau Mayor será o cheneral Sidki Sobhi, seguntes un comunicau d’o portavoz presidencial Iàsser Alí leito en a televisión publica.

O president tamién anunció un tercer nombramiento: o d’o vicepresident d’o país, cargo que asumirá qui dica agora yera vicepresident d’o Tribunal de Casación, maxima instancia chudicial, de segundo rango, Mahmud Meki.

Esmienda constitucional

Finalment, Mursi ha derogau a esmienda d’a Declaración Constitucional aprebada o 17 de chunio por o CSFA, que dica a triga de Mursi exerceba as funcions presidencials. Ista esmienda amugaba as competencias d’a presidencia y daba una gran independencia a l’exercito.

A esmienda modificaba aspectos importants d’a Declaración Constitucional d’o 30 de marzo de 2011, que ye a ‘fuella de ruta’ d’a transición politica dende o derrocamiento d’o president Hosni Mubarak.

A esmienda establiba que o president podeba declarar a guerra, con l’autorización d’o CSFA, y que en caso de disturbios podeba solicitar a intervención d’as fuerzas armadas ‘ta garantizar a seguridat y esfender a propiedat publica’, siempre con o visto bueno d’o CSFA.

Amás, a cabeza d’o CSFA, Tantawi, yera designau comandant d’as fuerzas armadas y ministro d’esfensa dica que no se promulgara a nueva constitución; y o CSFA yera declarau competent ta decidir sobre totz os afers relacionaus con as fuerzas armadas ‘incluyindo-ie os nombramientos d’as cabezas y a extensión d’os mandaus respectivos’.

En a mesma linia, estipulaba que o CSFA exercería todas as funcions lechislativas especificadas en l’articlo 56.1 d’a Declaración Constitucional dica que no se constituyise un nuevo parlamento.

O CSFA publicó l’anexo en a Declaración Constitucional pocas horas dimpués d’haber zarrau os centros de votación d’a segunda tanda d’as eleccions presidencials que dioron o poder a Mursi.

Fuent: http://www.vilaweb.cat/noticia/4034037/20120813/president-degipte-aparta-lexercit-poder.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.