O primer corrector ortografico aragonés ya ye disponible

O corrector fa servir software libre y se puede emplegar en Firefox, pero tamién en Openoffice u Libreoffice

Dimpués d’o primer traductor aragonés-espanyol, nos plega de nuevas una buena noticia dende o mundo d’o software libre: os usuarios que emplegan l’aragonés en os ordinadors disponen, por primer vegada, d’un corrector ortografico ta ista luenga.

Dende ista semana, os usuarios de Mozilla Firefox, Thunderbird y Seamonkey  pueden instalar o complemento “Corrector ortografico aragonés” (ta Firefox y ta Thunderbird).  A versión disponible ye a 0.2 (beta), que incluye mas de 20.000 lemas con a suya flexión.  O corrector ye compatible con os que se fan servir en atros programas informaticos, como os procesadors de textos LibreOffice, OpenOffice, Lyx y AbiWord, y os navegadors Chrome y Opera, y tamién con o corrector incluiu en quasi todas as zagueras distribucions de Linux. Encara que ya se pueden fer servir en ells, en os proximos meses amaneixerán complementos de buen instalar que faigan facil o emplego d’o corrector en totz istos programas.

O corrector marca as parolas que no reconoixe y suchiere l’emplego de parolas semellants, por o que fa honra ta privar errors tipograficos, pero tamién ta resolver dubdas ortograficas.  A disponibilidat d’o corrector en navegadors y clients de correu permite o suyo emplego en a cheneración de contenius (blogs, twitter, facebook…) y en a redacción de correus electronicos.  Os autors indican que continarán treballando en ixamplar y amillorar o corrector entre os meses venients, liberando nuevas versions, y en una segunda fase, l’adaptarán ta fer-lo servir con variedatz concretas, como o ribagorzano u o cheso.

4 Rispuestas a O primer corrector ortografico aragonés ya ye disponible

  1. @gerardoensuisse

    Sobrebuena noticia! marchamos amoniquet enta la normalidat, a vier si lo merca microsoft y se puede emplegar en office

  2. Tremendo documento. Plego de instalar-me-ne, como un nino enguerando calzero. A prebar-lo.

  3. Ye una noticia magnifica. Asinas ye como las lluengas minoritarias como la nuestra pueden ir enta debant, y “competir” con las mayoritarias. Parabiens a’ls suyos autors.

  4. instalar > botón dreita d’o churi dencima d’a parola que siga subrayada en royo > correchir parola.

    como siempre s’ha feito.

    Muit fácil, muitas gracias

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.