O primer imputau por as cargas d’Artieda diz debant o chuez que os verdugos esdevienen victimas

Ye o primer d'os imputaus que fa declaracion debant d'o chuzgau

Manifestants y Guardia Civil en Artieda o pasau diya 10

Manifestants y Guardia Civil en Artieda o pasau diya 10

A primera presona que ha declarau debant o chuez por as cargas policials d’Artieda o zaguer 10 d’octubre, Chesús Royo “Txema”, ha dito que ye “una vergüenya que en iste caso os verdugos esdeviengan victimas y a lo contrario”. Royo, que ha feito as suyas declaracions en os Chuzgaus de Zaragoza ye un d’os 8 imputaus por os feitos que pasoron en Artieda o zaguer 10 d’octubre, en que a Guardia Civil cargó contra buena ripa de chent que tallaba as dentradas t’o lugar ta viedar o paso a os tecnicos d’a CHE que quereban fer actas d’expropiación ta enamplar l’entibo de Yesa.

Royo, militant de Puyalón de Cuchas, ha ratificau a declaración que fació debant d’a Guardia Civil, esplanicando que desconoixeba que a Guardia Civil tenese intinción de cargar, porque en atras ocasions nomás que s’heban amanau ta fer saber a os concentraus que heban de desaloixar a carretera. “Cinco metros antis d’as pancartas, os achents cambioron o ritmo y prencipió una carga”, ha dito Royo, que deixó más de 13 ferius, encara que s’acusa a os imputaus d’atentau contra l’autoridat dimpués que a Guardia Civil os denunciase por agresions.

Royo, como a resta d’imputaus, culpan d’os feitos a o president d’a CHE, Xavier de Pedro, que heba solicitau a presencia d’os antidisturbios, asinas mesmo a o delegau d’o Gubierno espanyol en Aragón, Gustavo Alcalde, qui, en zaguera instancia ye o responsable politico d’as cargas policials.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.