O programa de cohabitación d’o Pirineu de Leida remata l’anyo con nomás dos enrestidas d’onsos

En Aragón no bi ha programas parellanos y os ganaders son pendients de recibir encara aduyas de 2010

Uellas (Foto: Wikipedia)

Uellas (Foto: Wikipedia)

O Parque Natural de l’Alt Pirineu de Leida ha rematau lo verano con o resultau de nomás dos enrestidas d’onsos a los estallos con o resultau de nomás dos uellas muertas. Iste resultau ye debiu, seguntes informa Pirineo Digital, a la espardidura a la Val de Cardós d’o programa de  cohabitación ta amerar conflictos entre o os estallos de uellas y os onsos. En iste verano i han participau 14 ganaders y 3.000 uellas. L’exito d’o programa ha feito que a Generalitat haiga confirmau a suya continidat en o verano venient, quan as uellas puyan t’os puertos d’alta montanya, a on que bi ha más risque d’enrestidas d’onsos.

O programa de cohabitación prencipió en 2010 en a Val d’Aneu y iste verano s’ixampló t’a val de Cardós, a on que os onsos i son de cutio. Mientres o verano los estallos d’una mesma redolada s’achuntan y s’aplican midas de seguridat como cusirar-los por un pastor mientres as 24 horas d’o diya, a presencia de cochos de protección y o zarre de nueitz d’o bestiar en os corrals. Con iste sistema, en iste verano nomás dos uellas morioron por os onsos y os suyos amos estioron indemnizaus por ista perda.

 

Tanimientres en Aragón, as aduyas que bi heba ta que os ganaders afectaus por l’onso se protechesen y compensasen os sobrecostes por a presencia de l’onso, se sacoron en cambiar-se lo Gubierno. Bells ganaders son encara pendients de recibir aduyas de 2010, un total de 187 expedients, con una valor economica de 190.000 euros, seguntes informa Pirineo Digital. Os ganadors no descartan ir t’a via contencioso-administrativa ta conseguir cobrar os diners comprometius por o Gubierno actual en 2012, que yera de 159.000 euros.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.