O PSOE acusa a lo gubierno de improvisar con os paradors d’Aragón

Esfiende a suya importancia en redoladas como Alcanyiz, Teruel, Sos u Bielsa.

Javier Sada (Foto: PSOE)

Javier Sada (Foto: PSOE)

O portavoz d’o PSOE en as Cortes d’Aragón, Javier Sada, acusó iste lunes, tanto a lo gubierno espanyol como a lo d’Argón de “improvisar” con os “Paradors Nacionals” d’Aragón y ha refusau qualsiquier prebatina de privatizar-los.

Javier Sada ha explicau que o suyo partiu ha presentau qualques iniciativas en as Cortes ta esfender los Paradors que bi ha en Aragón, asinas como en o Senau espanyol en contra d’a suya privatización. Uns Paradors que son en redoladas que considera “con fuertes posibilidatz turisticas y por un regular espobladas – Alcanyiz, Teruel, Sos u Bielsa, en a Val de Pineta – y que esdevienen o mayor foco d’atracción turistica ta ista redoladas. Manimenos, seguntes o portavoz, “o PP ye convertindo a los Paradors de buque sinyaler d’o turismo a nomas una patera”.

Sada s’ha penau de que no se’n sepa mica de Veruela, a tamás de que “hese supuesto un trango important, más que más, en una redolada que tien ya destacables recursos turisticos como’n ye Tarazona y con que se podría dentrar en a primer división d’o turismo por a suya promoción internacional”. “Ye una obra rematada que, con muito poqueta inversión, nomás amueblar-la, se podría prencipiar a fer funcionar y encara no se’n sabe mica”, ha criticau.

“Nunca no son estaus esclaters dende Madrit ni dende Aragón”, contina Sada. “Bi ha muita improvisación en ista y atras midas como a minería“, y critica a semisión de Rudi: “somos prencipiando a estar fartos de que a lo Gubierno de Rudi le preocupe tot lo que faiga Madrit cuanto a Aragón, pero ocupar-le no l’ocupa ni pon. Que prenga a suya responsabilidat”, avisa o portavoz d’o PSOE.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.