O PSOE alerta de que Cañete planteya cada vegada más o trasvase

As declaracions d'o ministro iste martes fan pensar a o PSOE en a posibilidat d'a planificación d''un trasvase dende lo gubierno espanyol

Javier Sada, d'o PSOE

Javier Sada, d’o PSOE

“Cañete torna atra vegada t’os suyos orichens, a monico pero firme, ta planteyar cada vegada con más rasmia que cal o trasvase de l’Ebro”. Con istas parolas, o portavoz d’o PSOE en as Cortes Aragonesas Javier Sada ha alertau d’as supuestas intencions d’o gubierno espanyol de fer un trasvase dende l’Ebro.

As declaracions de Cañete d’iste miercols son estadas lo suyo alazet. Astí, Cañete dició que “l’alcuerdo zarrau t’o río Tacho contrimuestra que un trasvase no tien porqué estar conflictivo” y que “os territorios que i sobra d’augua habrán d’atender a los que les ne cal”.

Debant d’istas declaracions, Sada ha exichiu una posición “esclatera y fura” d’o Gubierno d’Aragón: “Exichimos conoixer a posición d’o Gubierno d’Aragón y d’a presidenta Rudi sobre un futuro PHN a on que siga o trasvase de l’Ebro, porque muito nos tememos que faya como con lo deficit asimetrico u os Presupuestos Chenerals: que aquí digan que no i son d’alcuerdo pero que dimpués asuman los que les ne dicen dende Madrit”.

Sada tamién ha remerau que en a primer reunión d’a Comisión de Seguimiento d’o Pacto de l’Augua d’ista lechislatura, o ministro Cañete no descartó mica o trasvase de l’Ebro. En a segunda reunión, ha sinyalau, “no nomás no lo descartó, sino que ubrió a posibilidat si bi heba excedents”. Dimpués, en o Plan de Cuenca de l’Ebro se ubre a posibilidat de un trasvase ta Castellón de 10 hm3 t’a redolada de Els Ports y, recient, en o plan de cuenca d’o Segura, bi ha una diferencia entre as necesidatz que se aseguran en iste plan y a realidat hidrolochica d’ixe río de 480 hm3 que “encara que no la citan, no bi ha garra atra posibilidat de concarar ixas necesidatz a no estar con augua que vienga d’un trasvase de l’Ebro”.

T’o portavoz d’o PSOE, tot ixo, uniu a lo “historial d’o ministro Cañete”, les fa pensar que no “bi ha cosa buena cuanto a lo trasvase de l’Ebro y a suya relación con Aragón”, y han tornau a remerar que a presidenta d’Aragón, Luisa Fernanda Rudi, yera la presidenta d’o Congreso d’os Diputaus Espanyol quan s’aprebó o PHN que incluyiba o trasvase.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.