O PSOE califica de “caos” o proceso d’escolarización

Critica tamién a puyada de ratios, a falta d'equipamientos u as retalladas en o profesorau

Mayte Pérez, diputada d'o PSOE

Mayte Pérez, diputada d’o PSOE

O PSOE, de boca d’a suya portavoz en demba educativa, Mayte Pérez, criticó iste martes o “desconcierto y caos chenerau en más de 700 familias aragonesas que no tienen plaza en o colechio esleixiu por falta de planificación y o descontrol d’o Gubierno de Rudi en o proceso d’escolarización.

“A falta d’inversions en equipamientos, a  puyada de ratios, as retalladas en o profesorau y ixe doble criterio a l’hora de trigar domicilio familiar y laboral ha feito, desgraciadament, que en Aragón o proceso d’escolarización torne a estar noticia y siga un problema”, ha dito Pérez qui avisa que si no se mete solución l’anyada venient “o caos se multiplicará por tres”.

O PSOE ha demandau a comparecencia d’a consellera d’Educación, Dolores Serrat en o venient pleno de Cortes ta explicar o proceso d’escolarización y ta que “se comprometa a primar a igualdat d’oportunidatz”. Tamién presentará una propuesta no de lei ta que se faigan nuevas infraestructuras educativas en a ciudat de Zaragoza.

A portavoz d’o PSOE en a Comisión d’Educación ha criticau que s’haigan suprimiu un total de 32 unidatz en a escuela publica “lo que suposa retalladas en profesorau y masificación en as aulas”. Tamién fació referencia a lo conflicto en os vicos d’o sur de Zaragoza (Roseras d’a Canal, Arcosur y Val d’Espartera), en a zona 5 d’escolarización, a on que faltan más de 100 plazas en a ufierta ta 3 anyadas. O PSOE considera fundamental habilitar dos nueva unidatz en Roseras d’a Canal. Sobre iste vico, Pérez ha demandau a lo Gubierno que preveiga “de camín que se i construiga un nuevo centro que dé respuesta t’as necesidatz d’escolarización que bi ha hue, pero que en l’anyada venient serán mayors”. Tamién ha criticau a puyada de ratios y a falta d’aulas en Santa Isabel u en As Fuents – Sant Chusé.

“O gubierno Rudi ha apostau de traza esclatera por a privatización d’a educación“, ha dito la diputada d’o PSOE, y ha meso como eixemplo o concierto d’a escuela infantil Virchen de Guadalupe. “Os conciertos son autorizaus siempre que s’ufre un ciclo completo d’infantil y primaria. Iste centro no ufre educación en Primaria. Se concierta iste centro con nomás 10 demandas tenendo antimás plazas sobrants en o colechio concertau Sagrada Familia que ye en o mesmo vico”, ha explicau. “Isto no tien garra sentiu si no ye un modelo educativo esferent con una prioridat t’a escuela privada en contra d’a publica”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.