O PSOE creye que o cambio d’a lei urbanistica d’Aragón ye “tornar a tiempos d’Aznar”

Acusan antimás a la D.Ch.A. de no fer cosa contra os desafucios

O diputau José Ramón Ibáñez (Foto: PSOE)

O diputau José Ramón Ibáñez (Foto: PSOE)

O portavoz de Obras Publicas d’a Colla Parlamentaria Socialista, José Ramón Ibáñez,ha dito que a modificación d’a lei urbanistica d’o Gubierno de Rudi y a negativa d’o Gubierno espanyol de cambiar a lei hipotecaria suposa “tornar t’o modelo urbanistico de tiempos d’Aznar, a on que se meten os intreses particlars por d’alto d’os chenerals y para o terreno ta que bi haiga una nueva bombolla inmobiliaria”.

O diputau ha afirmau que “o PP planteya en as normativas suyas un estau asistencial amanau a la beneficiencia“. Manimenos o PSOE, diz o diputau, “esfiende l’estau d’o bienestar y os dreitos d’os ciudadans”. Ta esfender ixe modelo, o PSOE ha presentau arrienda preguntas sobre vivienda social, aduyas t’o loguero, u o nombramiento d’o director cheneral de vivienda, que no ye nombrau dende o pasau 25 de setiembre, lo que, en parolas de Ibáñez ye una “muestra d’a mielsa con iste afer d’o Gubierno de Rudi”.

O PSOE ha presentau una edmienda t’a totalidat a la lei urbanistica y 147 esmiendas parcials. Seguntes o diputau “os principals perchudicaus serán os concellos chicorrons“. Un d’os eixemplos d’o grau que ye a lei, lo ha feito con que “antismas, t’acceptar una urbanización d’una promotora privada, o silencia de man d’o Concello yera negativo, ista lei lo fa positivo; ye decir, si en o plazo de dos meses, un Concello no contesta, de traza automatica recibe a urbanización, siga como siga, y no se puet negar a recibir-la. En tot caso, si bi ha un tramite chudicial y se da la razón a o propietario, antimás caldrá indemnizar-lo. Por ixo deixa de tot sin esfensa a los concellos chicorrons que’n son os más en Aragón”.

Antimás, dende iste partiu se vincla a modificación d’ista lei con o decreto d’o Gubierno espanyol sobre os desafucios que “no soluciona o problema porque ye imposible cumplir os requisitos que planteya o Gubierno de Rajoy“. “Nusatros no queremos que bi haiga ni un desafucio más dica que a situación economica cambie. Somos debant d’un problema a-saber-lo grau que afecta a qui pierde a suya vivienda y a qui le han avalau, pais u chirmans, fendo-se a bola más gran. Por ixo queremos aturar totz os expedients y que os intreses deixen de contar”, han adhibiu.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.