O PSOE demanda a Rudi un “verdader” plan d’emplego choven

Tamién demandan que contine o Plan PREPARA sin as mugas que tien agora mesmo

Florencio García (Foto: PSOE)

Florencio García (Foto: PSOE)

O portavoz d’o PSOE en a Comisión d’Economía y Emplego, Florencia García Madrigal, ha reclamau hue a continidat d’o Plan PREPARA d’aduya de 400 euros ta esqueferaus que s’han quedau sin prestación por desemplego y a on que han d’estar incluyius os chovens, y ha exichiu a lo Gubierno un “verdader plan d’emplego t’a chovenalla, y midas reals ta incluyir a os chovens en o mercau laboral.

Agora mesmo, bi ha quasi 25.000 chovens d’entre 16 y 29 anyadas apuntaus en as oficinas d’emplego de tot lo país. A cifra ha puyau en 8.539 personas mientres 2012, un 8,37% respecto a 2011. Os menors de 25 representan un 10,66% d’o total d’esqueferaus

García Madrigal ha remerau que en a zaguer anyada d’o Plan PREPARA, o PP en sacó a os chovens “computando a renta d’os pais ta sacar-les l’aduya” empiorando asinas “a situación de l’ature choven”.

O portavoz considera que t’o PP o plan tien un caracter “asistencial u benefico” y no pas social, como demandan dende o suyo partiu. “O plan ha de continar sin as mugas d’agora, y dica que l’ature baixe d’una tasa d’o 15%”, ha adhibiu.

Debant de tot isto a Colla Parlamentaria d’o PSOE ha rechistrau una proposición no de lei a on que insta a lo Gubierno a que exicha a lo gubierno espanyol que se prolargue o Programa de Recualificación Profesional (Plan PREPARA), ta que, debant d’a grau situación de desemplego, se guarancie a protección social ta totz os ciudadans, incluyius os chovens. García Madrigal ha reclamau tamién que se recupere a esmienda de 10 millons d’euros d’o PSOE en os presupuestos d’Aragón endrezada ta un Plan Especifico d’Emplego Choven.

O PSOE ha remerau que a partir d’o venient 15 de febrer, as personas que acotolen a suya prestación por desemblego de ran contributivo, si o Gubierno espanyol no recula, quedarán sin una aduya minima.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.