O PSOE demanda aduyas ta encarar a grieu sequera

A colla socialista demandará manyana en as Cortz a o Gubierno d'Aragón una linia d'aduyas ta encarar as primeras midas por a grieu sequera.

Javier Sada, vocero d'o grupo socialista en As Cortz.

O Grupo Parlamentario Socialista demandará a o Gubierno d’Aragón que ubra una linia d’aduyas inicial d’a lo menos 500.000 euros ta encarar un programa que permita luitar contra a grieu sequera que ye sufrindo Aragón dende fa quasi un anyo y que ha suposau importants perdas t’o sector agropecuario.

A Comisión d’Agricultura d’as Cortz debatirá manyana una iniciativa d’o Grupo Parlamentario Socialista en a qual demanda a o Gubierno d’Aragón que presente un plan de midas ta compensar os grieus efectos d’a sequera. O vocero d’o Grupo Parlamentario Socialista, Javier Sada, ha sinyalau que “mesmo lo Pireneu ye padexindo una gran sequera y os sindicatos agrarios ya alertan de perdas de mas de 150 millóns d’euros, que serán mas amplas si remane a situación, por o qual se fa necesario establir un programa con una linia d’aduyas que incluiga subvencións de prestamos y atras midas ta encarar millor iste momento de dificultat”. Sada ha demandau a o Gubierno d’Aragón que coordine iste programa con o Ministerio y que permita abanzar un decreto de sequera ta que o sector pueda salir entabant.

O vocero d’o Grupo Parlamentario Socialista ha indicau que “en as nuestras esmiendas a os presupuestos de 2012 ya hemos incluiu ista partida inicial de 500.000 ta encarar ista situación preocupant t’os agricultors y ganaders d’Aragón”. Sada ha indicau que o embalse de Mediano ye solament a o 26 % d’a suya capacidat y Yesa tiene un 47 % menos d’augua entibada que en febrero de 2011.

En a iniciativa que se va a debatir manyana se solicita una linia d’aduyas t’a ganadería extensiva y atras zonas, un plan de reposición d’arbols muertos -derivau d’a sequera de l’agüerro y de l’hibierno que ha afectau a muitos olivars- y prorrogar o Plan de Restructuración Varietal de Fruita Dulza.

Javier Sada ha demandau a o Gubierno d’Aragón “mas achilidat porque leva aturau siet meses y ya va estando hora que prena decisións, ya que mientres aquí o Gubierno de Rudi no fa brenca con a sequera, o sinyor Cañete va dando tornadas con o suyo prochecto de trescole”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.