O PSOE demanda aulas puent en o colechio Roseras d’a Canal

37 familias s'han quedau sin plaza en iste colechio d'o sur de Zaragoza

Mayte Pérez

Mayte Pérez

A portavoz d’o PSOE en dembas d’Educación, Mayte Pérez, tornó a reivindicar iste lunes que o Departamento d’Educación habilitase aulas puent en o colechio actual de Roseras d’a Canal y de vez, encargar o prochecto d’o nuevo colechio ta “privar o sufrir que son tenendo as 37 familias que os suyos fillos se han quedau sin plaza t’o venient curso 2013-2014 “nomás por l’encerrinamiento u a intransichencia” d’a consellera Serrat. A colla parlamentaria, antimás, ferá una moción ta que o Gubierno i construiga de camín o nuevo centro.

Seguntes ha quiesto remerar a diputada, “a excusa dada ta no ubrir ixas nuevas dos aulas (que’n ferían un total de seis aulas de 3 anyadas) yera que no se podeba fer rebutir o centro porque no bi heba calendata ta construyir o nuevo centro, ya que no bi heba presupuesto; pero agoa que, seguntes dicen, bi ha espacio, diners y calendata ta construyir, no entendemos por qué o Departamento d’Educación niega que s’ubran as dos unidatz que mancan, espardindo a la catrinalla en o curso venient y en a resta, y obligando a las familias a fer verdaders sacrificios ta fer-lo u, lo que ye mesmo pior, no escolarizar-los”.

Mayte Pérez ha explicau que “os 15 millons que o Plan Impulso d’o Gubierno de Rudi destinará ta infraestructuras educativas se invertirán, entre atras cosas, en ixamplar Roseras d’a Canal y fer-ie un segundo colechio en ixe mesmo vico. Manimenos, ha dito, “a consellera Serrat contina negando-se a disposar d’aulas puent en l’actual colechio porque, seguntes diz textualment, “no se puet gubernar en a excepción”, una posición que “no entiende dengún, ya que si se ha asegurau l’ixample y o nuevo colechio, agora lo menos embolicau s’entrasca por l’encerrinamiento d’a consellera“, ha sinyalau.

“No tien mica sentiu que s’esparda a la catrinalla dende o curso venient y que no se faiga cosa ta privar ixe sufrir d’istas 37 familias, parando cuenta de que en o colechio d’agora bi ha aulas libres, clases y espacio, y los ninos que no tienen plaza podrían cullir-ie en o colechio”, afirma Mayte Pérez.

A partir d’o curso 2013-2014, istos escolars habrán d’ir t’o colechio Romareda, en o centro d’a ciudat, ta l’Almozara y mesmo t’o Vico Oliver – difuera d’a suya zona d’escolarización que le pertoca a los vecins de Roseras d’a Canal y que no permite o decreto d’escolarización d’o Gubierno -. “Sino fa bella cosa o Gubierno de Rudi, istos ninos s’han quedau sin plaza en l’unico centro d’o vico son condenaus a marchar a cinco kilometros de distancia a ir t’a escuela debiu a lo rebutients que son os centros más amanaus t’o sur”, ha explicau, por lo que ha dar ferrete con que “o Executivo ha de deixar d’un costau iste encerrinamiento y para cuenta de que nomás ell tien a solución; ta ixo, nomás ha d’amostrar o suyo compromís con istas familias”.

Ta rematar, a portavoz d’o PSOE se ha preguntau “a on queda a libertat d’as familias a l’hora de trigar” y considera que “se niega l’amostranza publica y de baldes porque ixos pais habrán de pagar a lo mes como minimo más de 150 euros (entre transporte escolar y minchador). Se ye qüestionando o dreito constitucional de l’amostranza publica y de baldes”.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.