O PSOE demanda un fundo ta guarenciar os suministros minimos vitals de luz y augua

A lei guarenciaría un minimo de luz y augua ta familias que no podesen pagar-la

Mariví Broto, d'o PSOE

Maria Victoria Broto, d’o PSOE

O PSOE ha presentau iste martes una iniciativa en as Cortz ta que o Gubierno aprebe un fundo de solidaridat de pobreza enerchetica obchectiva que guarencie los suministros vitals de electricidat y augua. A portavoz socialista en Servicios Socials, María Victoria Broto, ha remerau que, en istos intes, nos trobamos con una bolsa important de personas que fa poco teneban treballo y estabilidat y que podeban satisfacer las necesidatz vitals pero que agora no pueden fer-lo”.

En iste sentiu, a propuesta socialista planteya guarenciar, a traviés d’un plan economico, a ixas familias que les cal, a las personas con risque d’exclusión social y a los que reciben l’Ingreso Aragonés d’Inserción, os suministros minimos vitals de luz y augua: 1.400 kilowatts a l’anyo y 100 litros d’augua potable a o diya.

Broto ha afirmau que “o Gubierno de Rudi ha de guarenciar a dignidat; a crisi no ye so que una parola, no ye un concepto: son personas que sufren“. Ha sinyalau que, dica agora, tanto concellos como organizacions como Cáritas han habiu de fer-se cargo de pagos de luz y augua. De feito, ha subrayau, “o Concello de Zaragoza solucionó con aduyas de urchencia muitos casos ya que, por eixemplo, os temas relacionaus con a luz han puyau ista anyada un 123% as aduyas que ha caliu dar a diferents familias y Cáritas pagó 60.000 euros ta familias que teneban dificultatz t’os suministros vitals”. A diputada d’o PSOE ha sinyalau que en bells países europeus ya funciona iste fundo de solidaridat enerchetica y en atros territorios como Andalucía se ye prencipiando a implantar.

A diputada ha remerau que dende que gubierna o PP- PAR os problemas s’han feito más grieus dica o punto de que “bi ha 12.600 casas sin treballo, pensión ni subsidio; antimás, un de cada tres aragoneses se troba en risque de pobreza u exclusión, sin posibilidat de treballar”. Ha adhibiu que “en Aragón bi ha 33.000 casa con totz os suyos miembros en l’ature; tenemos 3.441 personas que cobran l’IAI y más de 1000 con dreito y sin cobrar-lo”. Tamién ha indicau que, dende que gubierna Rudi bi ha 22.168 aturaus más rechistraus.

Broto ha remarau criticando que o Gubierno  no querese aprebar a Lei de Renta Social Basica “encara que imos a continar dando ferrete porque queremos que o gubierno lo torne a planteyar”. Broto ha demandau a la presidenta que “tienga sensibilidat, ascuite a la sociedat y aplique ista propuesta”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.