O PSOE empenta a o PP a fer o Sobrarbe esquiable

L'importe d'a infraestructura puyaría a 40 - 50 millóns d'euros, que caldría sumar a os 94,9 millóns d'euros d'endeudamiento que tien o grupo Aramón

As obras d'enamplación d'a pista d'esquí de Formigal. (Foto: Plataforma en Esfensa d'as Montanyas d'Aragón)

O vocero d’a Colla Parlamentaria Socialista, Florencio García Madrigal ha demandau a o Gubierno d’Aragón que reconsidere o plan ta enamplar a zona esquiable ent’o túnel de Bielsa ta empentar o turismo en Aragón. García Madrigal ha indicau que “o Gubierno de Rudi ye aturau, no mete midas a la crecient puyada d’o desemplego y amás l’importa muit poco lo meyo rural como ha contrimostrau sacando lo Plan Red, retallando as aduyas a las linias d’autobuses rurals y rebaixando as alportacións t’as linias rechionals de tren”.

O vocero adchunto d’a Colla Parlamentaria Socialista ha adhibiu que “o Gubierno de Rudi retarda o proyecto d’o Sobrarbe porque o meyo rural l’importa muit poco y tampoco no ufre alternativas ta empentar o turismo”.
Istas demandas se fan dos diyas dimpués de que o president d’a redolada d’o Sobrarbe, Enrique Campo, l’alcalde de Bielsa, Antonio Escalona, o consellero comarcal y miembro d’o consello d’administración de Piau-Engaly, Miguel Noguero, y o consellero d’o PP, Rubén David Robles se reunisen con Gonzalo Lapetra, director cheneral de Turismo d’o Gubierno d’Aragón, ta demandar-le que o Gubierno d’Aragón reprena o plan d’enamplación esquiable d’o tunel de Bielsa. Os representants de CHA y PAR, que no podión acudir-ie, refirman ista enamplación.

García Madrigal ha indicau que a redolada d’o Sobrarbe ye a sola d’os Pirineus que no disposa d’estación d’esquí y existe un proyecto muit enantau en colaboración con Francia que ye asperando una decisión definitiva d’o Gubierno d’Aragón, “porque dica agora l’Executivo de Rudi ha iu dando largas y mesmo ha anunciau que lo retardaría, pero que existirían compensacións t’o Sobrarbe, compensacións que tot lo mundo esconoixe”. Cal remerar que Aragón ya tien siet pistas d’esqui, cinco d’ellas en a provincia de Uesca y a más d’o prochecto d’enamplación de Piau-Engaly, existe o prochecto d’enamplación de Cerler por Castanesa.

D’atra man, seguntes ha publicau Radio Huesca en a suya web, os tecnicos estiman que l’importe d’a infraestructura puyaría a 40 – 50 millóns d’euros, que caldría sumar a os 94,9 millóns d’euros d’endeudamiento que tien o grupo Aramón, interpresa participada a partis iguals por a DchA y Ibercaja, y d’os quals han de tornar o 60% a las entidatz financieras en o plazo maximo de tres anyos, seguntes publicó lo diya 9 d’aviento de 2011 Heraldo d’Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.