O PSOE presienta una proposición ta facilitar a presentación de ILPs

A modificación facilitaría la presentacion de Iniciativas Lechislativas Populars.

Javier Lambán y Eva Sáenz (Foto: PSOE)

Javier Lambán y Eva Sáenz (Foto: PSOE)

O PSOE presentó iste martes en as Cortz una proposición de lei ta facilitar a presentación de Iniciativas Lechislativas Populars. A proposición modificaría l’actual lei ta que os concellos podesen exercer iste mecanismo, antimás d’ixamplar as materias que puet fer-se, baixa o numer de sinyas que calen y os requisitos ta presentar-las, obliga a debatir-la en a mesma lechislatura que se presenta y mete una compensación economica t’os promotors.

Javier Lambán, president d’a Colla parlamentaria d’o PSOE, ha indicau que ista iniciativa “ye adintro d’a midas ta empentar dende o PSOE un nuevo prochecto politico que enforteixca a democracia, esvielle as institucions, tienga mayor transparencia y estableixca cauces ta una mayor participación d’os ciudadans en o gubierno d’as institucions”. “Dica agora as institucions han feito o suyo treballo masiau aluenyadas d’a opinión publica. Cal correchir ista diverchencia entre gubierno y ciudadans. Totz os partius politicos dicen que quieren responder, pero nomás o PSOE lo ye fendo con midas concretas”, ha dito.

Entre ixas midas, Lambán en ha nombrau que se incluyisen en a web d’as Cortz as percepcions d’os parlamentarios, que s’ixamplasen as audiencias lechislativas a los ciudadans u que s’enamplasen as incompatibilidatz economicas d’os diputaus.

A secretaria d’organización d’o PSOE, Eva Sáenz, ha enumerau os cambios en a ILP que pasan por baixar o numer de sinyas que calen a 10.000 – agora ye de 15.000 u por sacar as exclusions materials d’a ILP a la reforma de l’estatuto, os presupuestos y a demba tributaria. Quanto a la Iniciativa Lechislativa d’os concellos, Sáenz ha explicau que podrían exercer-la quince concellos de conchunta sin que calga que bi haiga un numer minimo d’electors u cinco concellos que’n tiengan 10.000.

O plazo ta replegar as sinyas pasaría de seis a nueu meses y s’obligaría a debatir a ILP en a mesma lechislatura que se presentase.  Sáenz metió como eixemplo dos ILPs sobre o Consello de Protección d’a Naturaleza y atra sobre cabidar enerchía que se debatioron a l’atra lechislatura de presentar-se. Antimás, os promotors d’as ILPs, en caso d’aprebar-se a proposición, tendrían una compensación economica de un maximo de 40.000 euros.

Eva Sáenza ha rematau sinyalando que as ILPs son una ferramienta que se fa servir muito en Aragón, encara que con poco exito, fueras d’o caso d’o Consello d’a Protección d’a Naturaleza. Tamién ha nombrau os eixemplos de Catalunya y Andalucía a on que ya han reformau ista lei.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.