O PSOE reivindica o dreito a decidir d’as mullers debant d’a lei Gallardón

O PSOE presentará una proposición ta que as Cortes refusen a modificación d'a "lei de l'alborto" planteyada por Gallardón

rueda de prensaA portavoz d’o PSOE en afers socials, María Victoria Broto, ha denunciau iste miercols “a grau inseguridat churidica y sanitaria” t’as mullers que provocaría a reforma de l’actual Lei d’Interrupción Voluntaria de d’o Prenyo planteyada por o Gubierno espanyol, de vez que ha criticau que o ministro Gallardón, con a enchaquia d’a crisi, planteye “ista modificación ideyolochica que dengún no ha demandau: ni as mullers ni a sociedat”.

Broto ha anunciau que o PSOE presentará una proposición no de lei ta debatir en as Cortz aragonesas a on que demanda a lo Gubierno d’o PP-PAR que s’opose y refuse qualsiquier modificación d’a Lei Organica 2/2010 de Salut Sexual y Reproductiva y d’a Interrupción Voluntaria d’o Prenyo, y que s’endrece t’o Gubierno espanyol ta que contine aplicando-se a lei actual en os terminos que ye feita.

Ixa lei, como ha remerau Broto, s’aprebó con o voto en contra nomás d’o PP y planteya midas en educación sexual, en prevención, en privar de que bi haiga prenyos no deseyaus y en a posibilidat de albortar en bells casos, entre as 14 y as 22 semanas. T’a diputada, iste “ye l’unico tema que pareix que o PP ye disposau a cumplir d’o suyo programa electoral”

A portavoz d’o PSOE ha reivindicau o dreito a decidir d’as mullers y ha demandau continar con a lei acutal, igual que contina en atros estaus europeus como Italia u Francia “haiga gubernau qui haiga gubernau”. Antimás, ha denunciau que “en un Estau de Dreito, a lei no puede estar fixada por a moral”.

“Con ista modificación, Gallardón y o PP sacan a posibilidat d’interrumpir o prenyo quan bi haiga una malformación. Antimás, en caso de problemas d’as mullers, habría d’haber una constatación, porque, bellas vegadas, diz Gallardón, as mullers fan servir isto como excusa”, ha remerau.

“As mullers queremos decidir sobre a nuestra maternidat, somos libres y no queremos que o ministro Gallardón prenga as decisions por nusatras”. ” No queremos que as mullers haigan de salir difuera d’Espanya ta poder albortat ni que bellas mullers arrisquen a vida suya en no tener guarancias sanitarias”, ha rematau Broto.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.