O pueblo catalán votó y desafió a prohibición d’a consulta independentista d’o 9N

I participoron 2.305.806 personas. Un 80,76% votó a favor d'a independencia. O resultau ha estau calificau d'exito atamás d'os entrepuces chudicials

Foto: Generalitat de Catalunya

Foto: Generalitat de Catalunya

Ahiere 9 de noviembre se celebró finalment a consulta independentista en Catalunya, con a incertidumbre d’a prohibición d’o Tribunal Constitucional espanyol a demanda d’o gubierno estatal. Manimenos o gubierno catalán metió as urnias y desafió o requerimiento chudicial.

2.305.806 personas votoron mientres a chornada o qual ha estau calificau de “exito” por os organizadors. Cal parar cuenta que as menazas d’o gubierno espanyol y a ilegalización d’a consulta, chunto a o boicot d’os partius espanyolistas y que a votación no teneba un caracter oficial ni vinculant han deixau chent en casa suya. Arredol de 5.540.000 personas yeran convocadas a votar, encara que no existiba un censo oficial.

Con tot y con ixo, 1.861.753 personas (80,76%) votó a favor de que Catalunya siga independient y de que se conforme como un estau (sí-sí). O “sí-no” aconsiguió 232.182 votos (10,07%). 104.772 fuoron os votos que aconsiguió o “no“, un 4,5%. Istos resultaus encara son provisionals, pues dica o 25 de noviembre se podrá continar votando en as siet delegacions territorials d’a Generalitat de Catalunya repartidas por tot o territorio catalán.

A chornada s’inició con as denuncias de Plataforma per Catalunya, Sociedad Civil Catalana, UPyD y PP contra a consulta, que fuoron acceptadas por chudgaus de Barcelona, Badalona y Tarragona, encara que os chueces se negoron a imposar midas cautelars, como a retirada d’urnias, en considerar-lo una mida desproporcionada. Os Mossos d’Esquadra facioron un listau de locals publicos que acubilloron a votación, con os suyos responsables y la entregoron a la Fiscalía Superior de Catalunya. Os chueces consideran que podió haber-ie delito.

Mientres a chornada no se destacoron grans incidents, fueras d’un ataque de faixistas en un colechio en Chirona, que no tenió conseqüencias, asinas como bella puerta de colechio zarrada con silicona.

O president Artur Mas compareixió debant d’os medios de comunicación pa fer as suyas valoracions sobre a chornada. Mas declaró que, os mas de 2 millons de votos “en istas condicions ye que ha estau un exito total“. “En bell moment queremos fer a votación de traza definitiva. Huei ye un trango de chigant. Huei i ha habiu una simbiosi perfecta entre institucions publicas, entidatz y teixiu asociativo y personas. O mensache ye que quan imos chuntos, abanzamos mas y millor“. Mas ha deixau claro que nomás ell y o suyo gubierno son os responsables d’a obridura d’os colechios.

Mas tamién ha declarau que “Catalunya, una vegada mas, ha deixau muit claro que queremos gubernar-nos a nusatros mesmos. Ye una viella aspiración d’o nuestro país, que viene de fa muitos sieglos, compatible con a construcción politica d’una Europa mas fuerte y unida”. Maitín martes Mas compareixerá dimpués d’o suyo consello de gubierno pa anunciar quáls serán os trangos a dar dimpués d’iste 9N.

Dende ERC, tanto Oriol Junqueras como Marta Rovira han calificau a chornada de “extraordinara” y han demandau eleccions abanzadas. “Quan parlamos d’obtener un mandau, creyemos que ha d’estar o d’unas eleccions constituyents, pa tener un parlamento que emprenda todas aquellas reformas lechislativas pa tener ubiertas as competencias; y de vez, tener un gubierno de transición nacional con maxima representación posible”.

Dende ICV, Joan Herrera reclama un referendum vinculant, amás d’un presupuestos chustos. Herrera considera que os catalans ahiere “dioron un trango de chigant”.

Dende as CUP, a diputada Isabel Vallet calificó tamién de “exito rotundo” a participación en a votación y declaró “que dengún no tienga a tentación de fer-se con a consulta, ista consulta ha estau un exito d’a chent“. Vallet anyadió “o que o pueblo quiere en iste proceso no se puede decidir en as institucions ni entre despachos”. Vallet afirmó que a independencia “ha d’estar un proceso dende abaixo que permita cambiar-lo tot“. Finalment agradeixió a o grupo d’observadors, entre as que yera una delegación aragonesa, a suya labor mientres a chornada.

Por a suya perte o gubierno espanyol compareixió a traviés d’o suyo ministro de Chusticia, Rafael Catalá, declarando que a consulta heba estau “pura propaganda politica, organizada por fuerzas partidarias d’a independencia y sin validez democratica“. O ministro no admitió preguntas y nomás podió acceder RTVE, deixando difuera a la resta de medios de comunicación.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.