O recreiximiento de Yesa, cada vegada más qüestionau

"Dengún no dubda de que o recreiximiento de Yesa mete en serio risque a vida de personas", diz l'Asociación Río Aragón dimpués d'o desaloix de 60 viviendas en Yesa.

Imachen d'a manifestación d'o pasau 15 d'aviento

Imachen d’a manifestación d’o pasau 15 d’aviento

Os movimientos de laderas en l’entibo de Yesa han feito qüestionar istos diyas, una vegada más, a seguridat de l’entibo y d’as obras que se son fendo-ie t’o suyo recreiximiento. Muitas voces veniban avisando dende fa anyadas d’os posibles periglos y, en zagueras, pareix que as suyas razons son más plateras que no nunca.

Dende que prencipioron as obras se han produciu bells quantos movimientos de tierra y han apareixiu brecas, belunas de muita grandaria. Manimenos son istos zaguers movimientos los que han levau a fer desaloixar 60 viviendas de dos urbanizacions – El Inglés y Lasaitasuna – d’o lugar de Yesa, en Navarra. D’as 60 viviendas, nomás ueito son residencias cutianas, pero os suyos habitadors talment no puedan tornar-ie dica que no pasen 9 u 10 meses. A propia Confederación Hidrografica de l’Ebro (CHE) estió qui coordinó, de conchunta con o Gubierno Foral Navarro y Protección Civil, o desaloix d’a redolada y reconoix que se fa por o periglo que tienen os movimientos d’as laderas de l’entibo.

Dende l’asociacion Río Aragón, opinan que “aturar Yesa ta cutio ye a unica solución sensata que guarancia a vida d’as personas y a racionalidat en o gasto publico” y remeran que  dica que prencipioron os treballos d’o recreiximiento, as laderas aguantoron plevias de muitisma más intensidat.” De feito os deslizamientos “prencipioron en o preto d’una sequera, ixo sí, dimpués de una anyada y meya de treballos”. A la CHE le demandan “sentiu común ta que no contine fuyindo entabant y prencipie a reconoixer as suyas errors”.

Atras organizacions, como Puyalón, s’han amostrau preocupadas por istos zaguers feitos y se preguntan “Si con l’actual entibo, y con os meyos invertius, a ladera se mueve de traza periglosa, menazando a vida de miles de personas si se crebase, ¿Como pueden guaranciar-n0s que, debant d’un recreiximiento que triplica a capacidat t’almacenar augua, pasando de 490 hm3 a 1500 hm3, la seguridat será guaranciada?”.

Tamién en Navarra

Encara que buena parti d’a oposición a lo recreiximiento deYesa plega dende Aragón, a on que ye a más gran parti d’o entibo, tamién en Navarra, a on que ye a paret, se i oposan bellas organizacions y vecins. Dende a iniciativa ciudadana contra o recreiximiento de l’entibo de Yesa “Yesa+no” de Sangüesa han penau por “a falta d’información t’os vecins desaloixaus d’as viviendas suyas” y han criticau a improvisación y o malfurrie d’a CHE.”

D’atra man, a diputada navarra por Geroa Bai, Uxue Barkos, demandó en o congreso espanyol d’os diputaus a comparecencia de Xavier de Pedro, president d’a CHE ta qu bi explique “os terminos y as circunstancias d’a ladera d’a marguin dreita de l’entibo de Yesa, asinas como as midas presas ta guaranciar a seguridat en a redolada”. Barkos ha esfendiu que bi ha alternativas más baratas a lo recreiximiento y diz “no entender porque bi ha tantas prisas en o Gubierno de Mariano Rajoy ta reprener ista obra que ha visto puyar as dotacions presupuestarias en as zaguers anyadas” entre que se son fendo verdaders astralazos en dembas tan sensibles como a sanidat u l’amostranza”

Puyada contina d’os presupuestos

A puyada contina d’os presupuestos d’as obras d’o recreiximiento ye una atra d’as razons que meten as asociacions y organizacions en contra d’a obra. Nomás en a estabilización d’as laderas se invertirán 10 millons d’euros, encara que, seguntes a CHE, ista yera una acción prevista que “s’ha enantau por as plevias d’os zaguers diyas” y que “rematará ta cutio con os problemas d’estabilidat”. O presupuesto total, seguntes denunció CHA, ha puyau dende os 113 millons d’euros en 2001, dica os más de 350 millons en os presupuestos d’ista anyada. A mesma CHE reconoixió que os costes finals de toda la obra “penderían d’a evolución d’os treballos”.

L’asociación de Sangüesa, Yesa+no, tamién denunció que se gastasen nuevos diners en estabilizar a zona, dimpués de que “s’ha contrimostrau que no ha serviu ta cosa o plan d’amillora d’a ladera dreita feito fa tres anyadas con 81 millons de presupuesto”.

As movilizacions contra l’entibo continan. Dimpués d’a gran manifestación d’o 15 d’aviento en Zaragoza, o venient sabado 16 de febrero a la 13:00, s’ha convocau una manifestación en Sangüesa, a on que se demandará que se aturen as obras d’o recreiximiento.

Nomás dende o Tribunal Supremo bi ha habiu una mala noticia t’os contrarios a la obra y ye que iste Tribunal ha desestimau o recurso meso por o Concello d’Artieda a on que trucaba o ficacio sobre as afeccions negativas t’o Camin de Sant Chaime que pasa por a zona afectada por o recreiximiento. Iste Camín habría de cambiar o suyo trazau en quedar-se parti d’ell engaronau por as obras. Manimenos, seguntes o Tribunal, “as normas internacionals que protechen aa Ruta no empachan un puntual y radiu desplazamiento de monumentos u rutas, siempre que no distorsione a plena percepción d’o suyo singular significau historico y cultural y que siga refirmau  por atender a atros intreses chenerals de más que notable intensidat”. O Concello d’Artieda estió condenau, antimás, a pagar os costes d’o proceso.

 

3 Rispuestas a O recreiximiento de Yesa, cada vegada más qüestionau

  1. Pingback: O recreiximiento de Yesa, cada vegada más qüestionau | AraInfo | Achencia de Noticias d´Aragón

  2. lo recreixement de l’entibo de Yesa és criminal en lo territori. estem a l’any 2013 perque continuem fen coses que recorden a altres règims…?

  3. Pingback: Artieda esfendió en as Cortes a oposición t’o recreiximiento de Yesa | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.