O rector alerta a la DChA d’os problemas economicos d’a investigación

O gubierno deberá a la Universidat de Zaragoza 120 millons d'euros a la fin de l'anyada

Manuel López

Manuel López, rector d’a Univesidat. (Foto: Universidat de Zaragoza)

Manuel López ha tornau a alertar a la D.Ch.A. d’a grau situación que se podría plegar-ie si o gubierno contina sin pagar os diners que debe a la Universidat t’os prochectos d’investigación y que ista ya ha adebantau. En iste inte ya debe 8 millons d’euros que, en rematar l’anyada podrían puyar dica los 20 millons.

En concreto, dende rectorau s’ha culpau a la consellería de Ficienda pues, seguntes han manifestau, tanto a consellería d’Educación, menada por Dolores Serrat, como a d’Industria d’Arturo Aliaga, han dau a orden de pago. Manimenos os diners no i plegan. Os diners ya s’han pagau de man d’a Universidat y por ixo, “si no se nos torna, se nos colapsa financierament”, ha dito o vicerrector de Politica Scientífica d’a Universidat, Luis Miguel García Vinuesa. Por ixo mesmo “o debat no ye si se paga u no pas. Ye o calendario de pagos.”

Istas declaracions s’han feito en o marco d’a sinya de dos convenios con a interpresa Abengoa por una valor de 600.000 euros. Istos dos convenios desembolicarán prochectos d’investigación en enerchías esviellables y sostenibilidat en l’Instituto Universitario de Investigación de Nanosciencia de Aragón y en a colla de procesos Termoquimicos de Instituto de Investigación en Incheniería d’Aragón. Representants d’a universidat y d’a interpresa han feito en as suyas charradas una esfensa d’a investigación como traza de salir d’a crisi.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.