O rei Alberto II de Belchica abdica en o suyo fillo Felipe

L'abdicación se ferá efectiva o 21 de chulio, fiesta nacional belga, coincidindo con o vinteno cabo d'anyo d'a suya arribada en o trono.

Albert_II

Alberto II de Belchica. Foto: Wikipedia

O venient 21 de chulio, diya nacional de Belchica, o rei belga abdicará en o suyo fillo Felipe, o prencipe hereu, por problemas de salut, seguntes anunció ahiere en un discurso televisau.

O encara rei declaró que “a mía edat y a mía salut ya no me permiten d’exercer a mía función como deseyaría”, evitando mantener-se en o puesto “a qualsiquier pre”. Tamién ha defendiu a institución monarquica y o rol d’o Rei d’os belgas, con una responsabilidat, que ha dito que ye “estar a o servicio d’a democracia y d’os suyos ciudadanos”. Alberto II considera que o suyo fillo y a futura reina consorte, Matilda, “son bien prestos” y tienen toda a confitanza d’o rei. Con tot y con ixo, o pueblo belga no confita en o suyo futuro rei. Nomás un 25% d’a población considera que ye presto pa lo cargo.

Manimenos, s’especula tamién con a posible relación de l’abdicación con ciertos escandalos financiers y amorosos en a familia reyal, como a creyación d’una fundación por parte d’a reina Fabiola pa evitar pagar qualques impuestos; as declaracions de l’artista Delphine Böel, que diz estar filla d’o rei Alberto II; y a supuesta homosexualidat d’o futuro rei, Felipe, considerando o suyo casorio con Matilde como “forzau”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.