O Reino Uniu accepta a legalidat d’una lei que mete a o galés y l’anglés como iguals

O gubierno britanico heba considerau levar a norma debant d'o Tribunal Supremo, con l'argumento de que lechislava tamién sobre a luenga anglesa

Asambleya Nacional de Galas (Foto: Wikipedia)

Asambleya Nacional de Galas (Foto: Wikipedia)

Os conflictos competencials que son prencipiando a surtir entre o Reino Uniu y Galas no afectarán, por l’inte, a la igualdat legal entre as luengas galesa y anglesa que Cardiff aprebó fa diyas. O fiscal cheneral d’Anglaterra y Galas, Dominic Grieve, ha decidiu que no levará a Lei de luengas oficials t’o Tribunal Supremo d’o Reino Uniu, a tamás de que a Oficina de Galas (un departamento d’o gubierno britanico) expresó o mes pasau as suyas dubdas sobre si a lei, aprebada por l’Asambleya Nacional de Gales, sobrepasaba as competencias d’ista cambra lechislativa.

O motivo d’a dubda yera que a lei preveye que l’anglés y o galés han d’estar tractaus con estricta igualdat en os procedimientos de l’Asambleya Nacional. Antimás, l’Asambleya habrá de fer servir as dos luengas en as suyas relacions con os ciudadans. L’argumento d’a Oficina de Galas yera que l’Asambleya galesa tien competencias ta lechislar sobre a luenga galesa, pero no pas sobre l’anglesa. Por contra, os lechisladors galeses consideraban que a mención a l’anglés en a lei nomás se feba en relación a o galés y que, alavez, no se yera lechislando sobre a primer luenga.

Conflicto competencial sobre os estatutos locals

A decisión de Grieve evita que apareixca un segundo conflicto competencial entre o Reino Uniu y Galas. O primer ye arredol de l’aprebación o chulio pasau, tamién de man de l’Asambleya Nacional de Galas, d’a Lei d’estatutos locals. O fiscal cheneral d’Anglaterra y Galas consideró que dos articlos d’a lei invadiban competencias d’o gubierno britanico, y lo planteyó debant d’o Supremo que s’habrá de decidir antis de Nadal.

A qüestión tien a suya importancia, porque a Lei d’estatutos locals estió a primer lechislación aprebada por l’Asambleya Nacional de Galas dimpués de que, l’anyada pasada, a ciudadanalla galesa aprebase en referendum enamplar de traza sustancial l’autonomía d’iste país en o Reino Uniu. A victoria en o referendum suposó que, dende alavez, l’Asambleya Nacional podese lechislar sobre una vintena de dembas sin haber de negociar con Londra. Ixo fa que l’amugue competencial agora siga clau t’o desembolique lechislativo de Galas.

 

Fuent: http://www.nationalia.cat/ca/noticies/1247

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.