O rescate financiero s’amana ta Aragón

O president d'a CREA ha demandau a Luisa F. Rudi que demande o rescate autonomico. Mientres en as Cortz s'ha discutiu sobre as conseqüencias en Aragón d'o rescate a la banca espanyola

Foto: Cortz d’Aragón

O president d’a CREA (Confederación d’Interpresaires d’Aragón), Jesús Morte, ha demandau a traviés d’una carta a la presidenta d’Aragón, Luisa F. Rudi, que s’aculla a o Fundo de Liquidez Autonomico (o rescate autonomico), pues seguntes a CREA, ye en chuego o teixiu interpresarial aragonés y con ell, a economía. A CREA considera que asinas s’achilizarían os pagos a proveyedors y as subvencions.

Tanimientres, o pasau 29 se discutió a demanda de IU en as Cortz aragonesas, en a Comisión d’Economía sobre as conseqüencias d’o rescate europeu de dica 100.000 millons d’euros t’a banca espanyola en Aragón. O consellero d’Economía, Francisco Bono, reconoixió que as midas a prener en iste rescate bancario perchudicarán a la ciudadanalla, pero manimenos no pas tanto a las entidatz bancarias aragonesas, que no han acudiu a garra aduya publica encara. O consellero ha esfendiu o rescate financiero t’a banca espanyola ta que torne a fluyir o credito, y ha criticau bellas d’as zagueras midas d’o Gubierno espanyol como a puyada de l’IVA y l’amnistía fiscal.

Dende IU, Luis Ángel Romero ha criticau ista serie de politicas de reformas d’o sistema financiero, y ha advogau por “cambiar o sistema y tirar en atra endrecera”.

Florencio García Madrigal, dende o PSOE ha criticau a chestión de Bankia y o rescate bancario, pues as midas a prener “no tendrán coste zero” t’a ciudadanalla.

José Luis Soro, dende CHA, se’n fa por as caixas d’estalbio, pues considera que pueden estar as mayors victimas d’o rescate. “Mientres l’obchectivo d’os accionistas sía o lucro, y no un esquimen ta repartir-lo socialment, continaremos muit alticamaus”.

Antonio Ruspira, d’o PAR, considera que s’ha de reinventar o sistema financiero y ha dito que “si no plega financiación t’o sector que menos capacidat d’autofinanciación tien, as familias y as chicotas interpresas, existirá un grau problema”.

Y dende o PP, Mª Yolanda Vallés afirma que cal “un sistema bancario que sía prou solvent ta inchectar capital y que dé garantía ta confitar en ell”, y ha asegurau que “ha faltau seguridat, credibilidat y confitanza”, razón por a que seguntes ista diputada, os mercaus internacionals no i han confitau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.