O rescate no convence a os mercaus y a prima de risque torna a puyar dillá d’os 520 puntos

A prima de risque espanyola remata a chornada d’o lunes en os 520 puntos, tornando a pasar dillá d’os 500 puntos que heba albandonau a zaguera semana. S’asperaba con intrés a reacción d’os ditos “mercaus” en conoixer-se que o gubierno espanyol heba acceptau o rescate d’os suyos bancos y encara que en as primeras horas pareixeba que a situgación se controlaba, a bolsa de Madrit ha cayiu y a prima de risque ha tornau a puyar.

Encara que o president d’o gubierno espanyol anunció ahiere que s’heba conseguiu un buen alcuerdo, y que no afectaria a la deuda publica espanyola, hue se conoixeba que a troika si que veilará por o destín d’ixos diners, dende Europa se deciba que ye de dar que si afectará a la deuda publica, porque l’ampre ye ta o FROB espanyol y que ye probable que as condicions imposadas suposen más retalles de l’estau de buenpasar y puyada d’impuestos. De feito, encara que ahiere o president espanyol, Mariano Rajoy, deciba que no i habria condicions, a realidat ye que Europa podria retirar a que l’executivo de Rajoy clama “linia de credito ta os bancos” si no cumple con os achustes que desiche la Unión.

Totz istos dandalos han tornau a fer baixar a bolsa y puyar a prima d’o risque, deixando en una situgación de nuevas muit periglosa o mercau d’a deuda publica espanyola y tamién a inversión privada en valors espanyols. Amás, l’achencia Fitch ha feito baixar a nota de rating de d’os d’as entidatz bancarias espanyolas más grans, BBVA y Santander, encara que as dos entidatz ya han anunciau que no amenistan recurrir a la inchección de fundos especials. Qui si podria acudir ye a nueva entidat bancaria formada por CAI, Ibercaja y Librebank, que podría amenistar dica 3.500 millons d’euros d’ixe fundo de rescate.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.