O rete ZAC de Zaragoza Activa enguera a suya propia moneda virtual

Tien más avantallas como una nueva portalada y un sistema t'amillorar o funcionamiento de La Colaboradora

capturaZaragoza Activa meterá en funcionamiento dende iste martes una serie de milloras en o Rete Social ZAC. Con l’obchectivo de continar amillorando a experiencia d’os usuarios de Zaragoza Activa y de introducir elementos que incrementen a eficacia en a chestión d’os recursos publicos, s’introducen en o rete social os clamaus “ZAC Coins”, una moneda virtual con que os usuarios d’o rete social podrán asistir a las actividatz que s’ufren en a suya programación. Cada usuario rechistrau en o Rete ZAC tendrá, en primeras, cinco monedas ZAC. Cada actividat costará una moneda, por lo que cada usuario podrá apuntar-se dica 5 actividatz de vez. L’usuario que efectivament i vaiga, será premiau con a tornada d’a suya moneda ZAC, ta poder continar fendo-la servir en nueva iniciativas y asinas mantendrá siempre o suyo credito integro. L’usuario que no pueda asistir puet, d’antes que prencipie, liberar a suya plaza t’atra persona y recuperar a suya moneda.

A mida preba d’aturar l’indice de absentismo en as actividatz – quasi siempre de baldes – que ufreixe Zaragoza Activa – más de 400 por anyada. L’absentismo, bellas vegadas, plega en o 20% de l’aforo, y muito a soben bi ha más chent intresada en participar-ie. D’ista traza, se preba de concienciar sobre a valura que tienen as actividatz de formación, divulgación y networking que fa Zaragoza Activa, encara que sigan de baldes.

Asinas mesmo, s’adhiben milloras en o disenyo d’a pachina d’o rete social, fendo-la más intuitiva y con muitos más contenius (zaguers noticias, actividatz destacadas, contenius exclusivos…). Antimás, se bi incorporarán milloras internas ta fer más facil a colaboración y l’intercambio de servicios entre os miembros d’o procheto de La Colaboradora, o prochecto de Zaragoza Activa a on que os suyos miembros, más de 200 agora mesmo, s’intercambean servicios de un sistema de banco de tiempo.

O rete ZAC prencipió a funcionar fa más de una anyada ta multiplicar as posibilidatz de conexión, aprendizache, networking y treballo colaborativo entre as cientos d’interpresas, profesionals y miembros de l’ecosistema emprendedor, creyativo y innovador de Zaragoza Activa. Conta con 5.400 usuario rechistraus (con una meya de edat de 37 anyadas y una tasa de feminidat d’o 48,5%), y ha chestionau más de 1500 eventos d’a programación de Zaragoza Activa, con más de 26.000 inscripcions, más de 30.000 conexions feitas entre os suyos miembros, incluyindo-ie 19.000 mensaches privaus u 2000 posts. ZAC tamién premia la trachectoria d’os suyos miembros con insignias simnolicas en función d’o suyo grau de colaboración y participación, sumando ya más de 3400.

Más información en: www.zaragoza.es/zac

 

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.